أكد الفنان كريم عفيفي أن مسرح الجامعة هو المصنع الحقيقي للممثل، أما المعهد هو تكملة، مشيرا إلى أن المعهد هو في النهاية دراستك فبالتالي أنت مُلزم به بسبب الدرجات، أما في مسرح الجامعة أنت موجود هناك فقط لأنك تحب ما تعمل ليس لدرجات أو أموال، وتلتزم به وبمواعيد البروفات لأنك تريد ذلك فعلا ليس لأي إجبار.وأضاف كريم عفيفي خلال حلوله ضيفًا مع زهرة رامي ومروان قدري في برنامج “عيش صباحك” على نجوم إف إم “ أن سك على إخواتك مسلسل كوميدي فلابد أن يكون أساسه ضحك وإيفيهات، قائلًا: "لكن هو بردو كان مبني على دراما وليه قصة مش بس إيفيهات. وبالنسبة لي الكوميديا خوفي فيها أقل لأنها الحاجة اللي عندي شوية خبرة فيها، على غير بقية الأدوار بتحتاج مني مذاكرة أكتر”.وعن علاقته بعلي ربيع وأوس أوس قال “أنا وعلي ربيع وأوس أوس مانفصلناش عن بعض في رأيي الموضوع كان صدفة، نتيجة للأدوار المختلفة اللي بتيجي لكل واحد فينا. وطبعا كنا بنكمل بعض مثلا ربيع ممكن يكتب بس ماينفعش يقود البروفة، أنا أقدر أضبط البروفة وكدة”.وتابع “بيبقى في ترشيحات مني أنا وربيع لفنانين في العمل اللي بنشارك فيه، والترشيحات بتبقى بناء على الراحة النفسية في التعامل وكمان مصلحة العمل نفسه”.وأضاف “أكتر واحد برتاح معاه وأنا بمثل هو علي ربيع، لكن حمدي المرغني بنرتاح سوا في التحضير وتظبيط الشغل”.أما عن رأيه في أفلام السبكي قال “السبكي لو مأنتجوش محدش بينتج غيرهم، في كل موسم من كل مثلا أربع أفلام بيبقى ليهم فيلمين، وفي رأيي هم عملوا طفرة في السينما”.وأكد عفيفي أنه لا يوجد نوعية ممثل أو مخرج لا يستطيع العمل معه حيث قال “أكتر حاجة بتضايقني من ممثل في الشغل، إنه يكون شخص قفيل أو كِشري، لكن بكمل شغل عادي مفيش مشكلة. ومفيش نوعية مخرج ماقدرش أشتغل معاه، الشغل مع مخرجين مختلفين ده متعه لأن كل واحد بيوجهك بشكل معين”.وعن رأيه في أشرف عبد الباقي قال “أشرف عبد الباقي شخص مجازف وطاقة طول الوقت ومُصر جدا على الحاجة اللي هو عايزها. وأكتر حاجة بتضايقه في الشغل هو التأخير أو إننا نقول إيفيه خارج مثلا، غير كدة مفيش”.وأردف “باخد رأي مراتي دايما وبتقرأ الاسكريبتات وبتقولي رأيها وهي اللي اقنعتني بـ “رمضان كريم”، وباخد رأي الناس اللي شغالين معايا، وبجمع أراء مختلفة وفي الأخر باخد القرار في العمل. ونفسي في يوم من الأيام أعمل بطولة نوعية الأفلام اللي بيعملها أحمد حلمي اللي هي فيها كل حاجة، دراما وقصة واجتماعي وكوميدي وفي إيفيهات، في رأيي دي التركيبة المثالية”.وعن أعماله القادمة قال “هنبدأ مسرح مصر أول يوم العيد الكبير إن شاء الله، وفي فيلم بالتعاون مع السبكي في الفترة القادمة”.