وأنا جالس بتفرج على مباراة الاتحاد والعروبة جلست أتحسف وأضرب أخماس في أسداس على مستوى الحكم عامر الشهري وبصراحة لا هو عامر ولا زاهر كرهنا في الكورة وكرهنا في الحكام لانه بصراحة ذبح الاتحاد من الوريد للوريد بقرارات عجيبة غريبة حتى حكام ملاعب الحواري ما يرتكبوها ياراجل خاف الله بلنتي واضح وضوح الشمس تحسبوا فاول على مختار فلاتة وفوق البيعة كمان تطردوا لكن الواحد ايش يقول إلا الله يستر لسه نحنا في بداية الدوري والخوف كل الخوف انه بعض الفرق تستفيد من تخبيص بعض الحكام. ما علينا نرجع لموضوعنا.. المهم والمباراة على نهايتها جات الحرمة وهية بتزغرط لولولولولولولولولي وبتقول خلاص ياسيدي حنفتك من الإيجار وهموو وغموو وشوف الخبر مكتوب في الجريدة حقتكم، وايش بيقول الخبر وريني .. اهو ياسيدي مكتوب بالخط العريض (إدراج مليون وحدة سكنية في مشروع «إيجار» العام المقبل. يابنت الحلال تاني مرة اقري الخبر بالتفصيل وانتي تعرفي ايش الهرجة هدا ياستي مشروع تنظيمي مابين ملاك العماير والمستأجرين الغلابى اللي مو عارفين كيف يتصرفوا من طمع وجشع بعض ملاك العماير ولا يشبعوا كل ما خلصت سنة دقدقوا البيبان ورفعوا الايجارات على المستأجرين .. ياخسارة على بالي انه وزارة الاسكان هي اللي ح تتكفل بدفع الايجار على السكان الغلابى .. ههههههه اسكتي لحد يسمعك قال وزارة الاسكان راح تدفع الايجار قال وزارة الاسكان .. لها كم سنة وهي جالسة تخدرنا وتبنجنا بأخبار وتصاريح زي الفل لكن الواقع بيقول غير كده ، لنا كم سنة بنسمع أخبار عن السكن وأخبار عن القروض العقارية ولسه اليين اليوم ما انحطت طوبة في كل المشاريع اللي قالوا عليها والحبايب ملاك العماير طايحين فينا طيح والحبايب في أمانة جدة بتوزع المنح للغلابى من الناس في مخططات خارج العمران وخلاص لكن تتلحلح وتتحرك وتدخل الخدمات في مخططات المنح عشان الغلابى من الناس يقدروا يبنوا لهم على الاقل دور أرضي يستروا نفسهم فيه ويفتكوا من جشع وطمع ملاك العماير .. ياوزارة الإسكان حكاية الايجار ما يبغالها لا تنظيم ولا تقنية لانه المستأجر اللي يعرف حقوق المالك بيدفع من سكات من غير لف ولا دوران وإن كان في بعض المستأجرين اللي يحبوا يعكننوا على المالك تقدر مجموعة من الادارات الحكومية من شرطة وإمارة يتصرفوا معاهم لكن المصيبة انه الخير يخص والشر يعم وأصابيعكم مو وحدة، وعشان كده بقول يا حبايبنا يللي في وزارة الاسكان تكفون لجل الله أبوس راسكم عجلوا في مشاريـع الاسكان والقروض العقارية واسترونا في الدنيا دي عشان ربنا يستركم في الاخرة وارحمونا من جشع وطمع بعض ملاك العماير اللي اخدوا عبارة ( العقار حـر ) طريقة لبهدلة وتشتيت عوايـل كانت ساكنة في أمان الله وبتدفع الايجار اللي تقدر عليه... وعيشوا كتيييييير تشوفوا كتيييييير. للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 150 مسافة ثم الرسالة abofatoo@hotmail.com