علّق الدكتور فتحي الشرقاوي، نائب رئيس جامعة عين شمس لشئون التعليم والطلاب، على ما تم تداوله مؤخرًا حول فيديوهات تحدي الأغنية الشهيرة "كيكي"، قائلًا: "آخر موجات الهبل والهطل والعبط في الشارع المصري إن الواحد يبقى سايق عربيته في أمان الله وفجأة والدنيا زحمة يقوم نازل هو وعياله والولية مراته، وهاتك يارقص وهز الوسط، رقص بضمير ومن اللي قلبك يحبه، ويا سلام لو كانت الرقص بلدي تبقى طبلت وطينت". وأضاف "الشرقاوي"، عبر حسابه الرسمي بموقع التواصل الاجتماعي "فيس بوك": "طيب لو واحد زي حالاتي من بيئة متوسطة وغلبانة، ومابيعرفش يرقص الرقص الإيقاعي على المزيكا الهادية والرومانسية يعمل إيه بقى ساعتها، أكيد هيرقص على انغام مزمار عبد السلام أو انغام مهرجانات التكاتك واوكا واورتيجا، ويا سلام على الخمسات والسبعات وشغل المطاوي والسافوريا والبشلة والسنجة، يعني البلد كلها هتبقى صالة ديسكو، واللي مايشتري يتفرج".