زي ما انتوا عارفين النهاردة يوم التلات و كمان 31 ، و يوم التلات معروف كلنا بنعمله حساب وعشان كده كمان انهاردة عيد ميلادي فالنهاردة بفكر نفسي بال 30 إسفين اللي عديت بيهم في ال 30 سنة من عمري وعشان لما اقولهم ليكم جايز تاخدوا بالكم فمتلبسوش في الحاجات دي و تشوفوا أنواع تانية و ابقوا افتكروا تحذروني عنها بقا .. يلا نبدأ ؟1 - متديش اوي ..متديش حب اوي ..اهتمام اوي..ثقة اوي..عشان علي قد ما حتدي حتاخد .. لا مش من نفس الصنف حتاخد بفيونكة إسفين هيعملك متديش الا لما اللي قدامك يديك من قلبه فعلا و يفضل يثبت ده من غير زهق ولا مقابل .. ايوا من غير زهق و لا أي مقابل .2- الحضن وسيلة بتطمن و بتجبر و بتدي طاقة حب حقيقية اختار مين اللي يترمي في حضنك و مين اللي تترمي في حضنه عشان في ناس بتترمي في حضنك كأنها محتاجه و هي بتقرب بس عشان تأذيك...3- و انت ضعيف و ملكش ضهر متقولش ده لأي حد عشان بتفتكر إنك لما تقول كده هتاخد طبطبه .. جايز وقتها يطبطبوا بس بعد كده حتدور عليهم و مش حتلاقي غير ناس غريبة و احتمال متلاقيش حد خالص و حتفتكر وقتها إنك كنت بتتخيل..(يستحضرني لقطة احمد حلمي في فيلم أنا أسف علي ازعاج وهو بيدور في الصور كانوا هنا يا ماما دوري معايا ..كانوا هنا(4- متعيطش قدام حد خالص. مش المفروض تسيب أي حد يشاركك لحظات ضعفك غير لو عمل مجهود حقيقي يخليه يستحق ده . أي حد ممكن يشاركك لحظة فرح / غضب / حماس لكن لحظة الضعف أمانة كبيرة اوي و مش أي حد قدها . 5- الحقيقي في فرحه مش شرط يبقي حقيقي في حزنه معاك .. بلاش توزع ثقة و تضيع لحظات حلوة .6- في جملة كليشيه أكيد في حياتك سمعتها "أنا صحابي يتعدوا علي الأيد" الجملة دي حتعرف معناها قدام بعد كام صدمة في ناس حواليك كتير و حيطلعوا سراب .. متعاتبش لما تلاقيهم مش موجودين هو في حد بيعاتب سراب ؟7- الجدعنة و الضهر و السند و الأخ و الأخت و الراجل و الست اللي بميت راجل لو في لحظة (لحظة ) ملاقتهمش جمبك متزعلش عشان كل ده لو ظهر معاك فجأة و اختفي أعرف إن كان وراه مصلحة أو مش حقيقي .. يؤسفني اقولك كنت مغفل / مغفلة .8- في ناس هتحبهم من قلبك و حتعتبرهم كمان اهلك و ممكن العشم ياخدك تجيب ليهم اللي بيحبوه ما انت خلاص اعتبرتهم أهلك.. متتفجأش لو لقيت إن دول أول ناس هيبيعوك عشان انت اديتهم حاجة غالية اوي و الغالي للغالي.. مش حيقدروه و حيرموه في أقرب صفيحة عشان هما مش متعودين علي الغالي يا غالي.9- لو حبيت / حبيتي واحد و خانك ..اللي يخون مرة يخون ألف . الطبع مبيتغيرش ..الطبع بيطلع بطلوع الروح .10 – الفرصة التانية لأي شخص لو اديتها مرة و متقدرتش و روحك حلوة و اديتها مرة و اتنين و عشرة و نفس الشخص طلب فرصة تانية صدقني هيعمل نفس اللي عمله في الفرص اللي فاتت ..هيضيعها!11- العشم .. الكلمة دي كبيرة اوي متتعشمش في حد يفهمك و يقدرك و يحبك لمجرد إنك كده مع الشخص ده .. مش عشان انت جواك نضيف و بتدي من قلبك ان الشخص ده في المقابل هيقدرك ويخلي عشمك في محله .12- الحب مش مستحيل بس لو اديته لشخص في حياتك متقدرش و ووعدك إن هيقدره .. ساعات نادرة الشخص بيكون خسرك فعرف قيمتك و بيعمل ده فعلا و ساعات أكتر الشخص ده طبعه بيضيع كل حاجة حلوة في ايده.13 – في الشغل اختار مين يكون قريب و مين يبقي بعيد..مين ممكن تكون مخنوق فتحكيله عن حاجه شخصية و مين تبتسم ابتسامة صفرا و انت هتموت وتفضفض وتقوله أنا تمام .. عشان كتير بيقربوا فضول و مجندين يبقوا عصافير و الخازوق بيجي من هنا مفاجيء و كبير.14- الشغل مش عشان تطلع بيه بصحاب ..ممكن تطلع بمعرفة ..بمصلحة ..نادر اوي لو طلعت بصاحب .. و عشان تتأكد انه صاحب لو عدي معاك أكتر من سنة و كان معاك في الحلو و الوحش حطه في المتحف و احمد ربنا عليه15 - كلمة صاحب ..كلمة غالية متقولش علي حد صاحبي ألا لو كان صاحبك وقت الفرح و الحزن و كل وقت.16- بطل تزعل علي أي حد كان موجود و قال كلام في ضهرك ..و اوعي تعاتب ..العتاب غالي عشان بتبقي باقي..لكن تبقى ليه علي الرخيص ؟ ارمي ورا ضهرك.17- اللي موجود و انت مش بتديله أي حاجة بمعني أي حاجة ده اللي يوم ما حتديله سر حيرميه في بير عشان هو موجود عشانك بجد مش عشان أي حاجة .18 – الأهل حتي لو من دمك ممكن يخونوا العشرة .. مفيش rules الخازوق مبيعديش منها .. حرص ولا تخون .. فعادي يا معلم لو جالك إسفين من أي حد ..ده ممكن يجي من أهلك.19 – أعمل الخير و ارميه البحر متستناش تقدير ولا شكرا ولا وجود حد في حياتك أعمل الخير لنفسك عشان متغيرش الحلو اللي جواك مهما شوفت وحش .. 20- كلمة بحبك غالية متقولهاش لأي حد افتكر الجملة العبقرية لأحمد زكي في مشهد من فيلم اضحك الصورة تطلع حلوة“كلمة أنا بحبك عقد، اللمسة عقد، النظرة عقد، الوعد بالجواز دا أكبر عقد" .21 – صحاب المصلحة اعرفهم لما تلاقيهم بس وقت مصلحتهم ولما بتحتاجهم بخ سراب . دول واضحين و بيقولولك هاي أنا الإسفين اللذيذ يا فنان ! 22- وقت نجاحك حتلاقي كتير ناس حواليك فيه فعلا اللي بيفرحلك من قلبه و شايف إنك تستاهل الخير ده و فيه اللي بيقرب عشان عنده حاجة عاوزها منك .. خد بالك !23- في شخصية في الولاد هتقولك أنا الجدع أنا الصاحب أنا الأهل أنا الأم أنا الخالة .. ده بقي ولا حاجة عشان اللي كده فعلا مبيقولش .. ده بيقولك عشان يثبت سلامة نيته بس فيه وراه حاجة مستخبية .. ايواااااااا قول معايا؟ إسفين ان شاء الله.24- فيه صحاب حطهم في خانة الإنبساط و بس يعني خروجه حلوة - فيلم لذيذ - طاولة بس مش أكتر من كده ..لو اتسندت عليهم هتقع عشان هما مش موجودين غير في لحظات الهلس العميقة دي .25 – لو قعدتي سنين سند و ضهر لراجل و اديتله أمان و حب و مشوفتيش منه غير نكد و زعل و كسرة نفس و لوم منه إنك مكملتيش مقهورة .. متكمليش عشان بدل ما هتعيشي مقهورة حتموتي من القهرة.26- اعملي بأصلك بس متستنيش شكرا ولا حتي أي نوع تقدير عشان الأصل مبيتشكرش عليه .27- في ناس بتعيش سنين قدامها حب العمر .. الحب اللي ممكن يتسندوا عليه العمر كله بس بيضيعوه.. و أول مابيضيع بيعرفوا قيمته .. بس اللي ضيع الألماظ عشان تراب مش هيقدر قيمته و هيرجع تاني يدور علي الرخيص و صدقني برضه هيضيعه.28 – اللي يقف جمبك و يقدرك و يفضل موجود اوعي في يوم تنشغل عنه لما يحتاجك عشان لما حتخذله هو مش هيوجعك .. بس وجعه إنك هتفقد شخص حقيقي و ده عملة نادرة اوي عشان تلاقي حد حقيقي في حياتك .29 - العشرة مبتهونش إلا على ولاد الحرام. (الجملة الكليشيه دي طلعت حقيقية ( لو هانت عشرة سنين علي حد .. متزعلش ماهو ابن حرام ! 30 – حب نفسك .. عزز نفسك أنت غالي .. قيمتك مش من أي حد يقدرك .. قيمتك اعرفها انت عشان لو استنيت تعرف قيمتك من الناس .. الناس الغلط هيقنعوك بعكس كده عشان يلبسوك الإسفين التمام اوعي تلبس أنا حذرتك .