خصص الإعلامي أسامة كمال، حلقة اليوم من برنامجه، لاستقبال شكاوى المواطنين، مضيفا:" الناس فى مصر بتشتكى، غالبا بتشتكى من الحكومة وعمايل الحكومة، وقرارات الحكومة وأحيانا افترا الحكومة، والحكومة من وجهة نظر الناس، ممكن تبقى موظف صغير أو عسكري أو باشكاتب".وأضاف خلال برنامجه " مساء dmc"، ليوم الثلاثاء": "لما تسمع كلمة الحكومة عملت، مش شرط يكون اللي قدامك قصده رئيس الوزراء أو وزير، ومش شرط تبقى المشكلة عويصة، ممكن تبقى حاجة صغيرة جدًا يحلها غفير بس الطبيعى أن كل واحد يشوف مشكلته هى أكبر مشكلة، وحلها من وجهة نظره يعنى صلاح الكون". وتابع: "لكن فى السكة يجب أن نعلم أن مشاكل كتير من اللي يواجهها المواطن بيكون منه فيه، يعنى مواطن قصاد مواطن، مواطن قدام أخوه، مشاكل بعضها خفي مش ظاهر، وبعضها يضرب عرض الحائط بكل الثوابت التى نعرفها".وتابع كمال: "مسكنا فى بعض لما الناس فى تونس قالت البنت تاخد زى الولد فى الإرث بالمخالفة لنصوص القرآن، ومسكنا فى بعض المشايخ لما أيدوا الكلام حتى لو كانوا تراجعوا بعدها، لكن كلنا فى مصر عارفين وساكتين ومطنشين، سواء كانوا المطنشين أزهريين معممين، أو مش أزهريين ولا معممين".وتساءل كمال: "لا أعلم ماذا يحدث في القرنة بمحافظة الأقصر ولا أعرف النظام فى كل حتة ماشى أزاى إنما أعرف أن كتير من البنات فى الصعيد ما بتورث، المخالفة لشرع ربنا، ولو ورثوا ياخدوا كام ملطوش ما يساويش 1% من حقها".وختم حديثه قائلا: "هل اتهز للشيوخ جفن بسبب المخالفة الشرعية دى؟ هل اتهز لرجال القضاء جفن أو رجال النيابة، أو كل القائمين على أى شىء فى مصر. هل أنا بأبالغ أو بأزايد، لا مش بأبالغ ولا بأزايد أنا بس بسأل هل السكوت ده طبيعى ولا المخالفات الشرعية نقاوة؟".