تعرض الكاتب الكبير والاديب إبراهيم عبد المجيد لموقف محرج بمعرض القاهرة الدولى للكتاب فى يوبيله الذهبى، وذلك بعد ان توجه لحضور حفل توقيع كتابه والذى يأتى فى إطار حفلات توقيع الكتب التى تنظمها هيئة المعرض بعد ان كانت دور النشر هى من تنظم حفلات التوقيع فى الدورات السابقة لمعرض الكتاب، وفوجىء ان القاعة لا يوجد بها أى كراسى أو ترابيزات كى يتمكن حتى من الجلوس هو والحضور، وهو الأمر الذى وصفه الكاتب الكبير بانه شىء يكسف. وانتقد عبد المجيد فى تصريح له على صفحته على موقع التواصل الإجتماعى "فيسبوك" عمليات التفتيش المستمرة داخل المعرض وعدم تواجد اى نوع من التنظيم فى المعرض . وقال عبد المجيد فى تصريحه " اسوأ حاجة كنت اتصور انها تحصل حصلت النهاردة في المعرض . رحت وانا اصلا تعبان احضر حفل التوقيع وانكسفت اعتذر علشان مازعلش دار النشر . رحت الساعة 3 علي اساس اقعد شوية مع الاصدقاء . سألت عن مكان التوقيع وعرفته بصعوبة لان التوقيع السنة دي مسؤولية الهيئة مش دور النشر . دور النشر فقط ترشح لهم الاسماء والهيئة تحدد المكان والزمان ولا اعتراض من دور النشر" . وأضاف : "المهم عرفت المكان بس مادخلتش علشان طبعا لسة بدري . الساعة السادسة والربع عرفت من دار النشر انهم بيحاولوا تغيير المكان ولم أجد كرسي لي اقعد عليه ولا ترابيزة يحطوا عليها الكتب . انا كنت عرفت بدري بعدم وجود كرسي ولا ترابيزة وان التربيزة والكرسي اتسرقت.إزاي ماعرفش . وانهم حيجيبوا غيرها وماجابوش . وعرفت ان ناصر عراق جه امبارح ولقي الوضع كدا برضه ومشي ماعملش توقيع . الدار مكسوفة تقول لي ان المكان المخصص زفت وكانوا وفروا علي المشوار وانا مكسوف منهم ومش عايز اعتذر" . وأستطرد : "المهم فاضل دقايق ع الميعاد . غيرناه في الدار لكن طبعا ما يلحقش البوست اللي كتبته عن التغيير ينقرا ربع ساعة وقعت فيها كام كتاب وقمت معتذرا عن الاستمرار . وانا خارج قابلت كتير من اللي جايين يشتروا الكتب وبيدورا علي مكان الدار اللي بعيد عن مكان التوقيع الاصلي . بس ناصر عراق طلع اذكي مني ومشي وانا انكسفت من الدار والدار انكسفت مني. وأوضح : "هو يوم من اوله مش حلو لاني لما وصلت لاقيت طوابير للدخول من الباب العمومي للتفتيش . ماشي . وكمان طوابير تاني للتفتيش لدخول الصالات . طيب ليه . وانا رغم اني ممكن ادخل من غير طابور بس عملتها علي باب الدخول العمومي وانكسفت اعملها علي باب دخول الصالة ورحت قعدت في القهوة مع الاصدقاء لحد قبل الميعاد بشوية وحصل اللي حصل . انا باعتذر لكل اللي جاء ومالقانيش في المكان الاولاني وكل اللي تاه علشان يلقاني في المكان التاني وكل اللي قابلوني برة المكانين علشان كنت تعبان وعلي اخري لا قادر اقعد ولا اقف .