يعانى أهالى شارع ترعة الزمر، بأرض اللواء بمحافظة الجيزة، من تهالك الطريق الرئيسى ووجود حفر كبيرة بالشارع، كما يعانون من تراكم القمامة باستمرار وبكثرة فى الشارع، وسط غياب وتجاهل من المسئولين. ويقول حسين عبدالغنى، أحد أصحاب الورش بالشارع، نعانى من حالة اللامبالاة من المسئولين، المياه بتقطع لفترات طويلة، والشارع كله «حفر» ومتكسر ومتبهدل ولا يصلح للسير، وكل شوية يحفروا فى الشارع ويمشوا من غير ما يردموا الحفر. وأضاف، الحفر دى بتعمل مشاكل وخناقات كتيرة بين السواقين، لأن فيه ناس فيهم بتسوق بسرعة، فممكن يخبط فى اللى قدامه، وكمان العربيات بتتبهدل بسبب الحفر، وكل يوم بنلاقى عربية واتنين وتلاتة المساعدين بتاعتها بتتكسر من الحفر اللى فى الضلمة. ويقول محمود إبراهيم، أحد سكان الشارع: «الطرق غير ممهدة للسير، وخاصة للمعاقين وكبار السن وسط غياب وتجاهل من المسئولين، رغم أننا بشارع رئيسى وكبير جدًا، مؤكدًا أن الأهالى اضطروا إلى القيام برصف جزء كبير منه من جيوبهم الخاصة بعد هطول الأمطار».وأضاف، نطالب المسئولين بالنزول للشارع ورؤية هذه الحفر وإعادة رصفها، وقال لا نطلب شيئا مستحيلا، وكل ما نطلبه من ضمن حقوقنا، مؤكدًا أن الأهالى سيقدمون الدعم المادى والمعنوى للمسئولين فى إعادة رصف الشوارع.كما تراكمت القمامة بشكل مستمر بالشارع، مما تسبب فى انتشار الروائح الكريهة والتى بدورها تتسبب فى انتشار الأمراض والأوبئة بين الأهالى فى المنطقة، ورغم مناشدتنا المستمرة للمسئولين ولكن دون استجابة.