علق أحمد عفيفي المتحدث الرسمي لنادي بيراميدز علي خسارة الزمالك من جور ماهيا الكيني برباعية مقابل هدفين فى الجولة الأولى من دور المجموعات بكأس الكونفدرالية.ونشر عفيفي عبر حسابه "الفيس بوك"، قائلا "معظم أسباب اللي حصل حاجات قديمة شوفناها كلها قبل كده.الزمالك لما بيبقى في إيده يخلص الماتش بيستسهل ويدخل الخصم (مهما كان ضعيف ومستسلم) الجيم ..قديمة.الزمالك عنده مشكلة في الارتداد الدفاعي مالهاش حل في الماتشات الصعبة (أو اللي بيخليها الزمالك صعبة) إلا اللعب بـ٣ في نص الملعب لتغطية عبد الله بالذات المحروم من المساندة الدفاعية لكهربا معظم الوقت .. قديمة. كهربا شخصيًا بيضيع وبيفقد الكورة معظم الماتش بمنتهى السهولة .. قديمة. الزمالك في أوقات بيحتاج بس يقف على الكورة ويدورها وبدلا من الاستحواذ وفرض السيطرة بيلجأ لكرات مباشرة سريعة طويلة بتتقطع بسرعة وترتد فيتحول الماتش لاحداث بتحصل في نص ملعب الزمالك .. قديمة. لاعب عائد من فترة غياب فمش بس ميبقاش ١٠٠٪؜ لا ده يحسسك أنه أول مرة يلعب كورة كأن مفيش حاجة اسمها تمرين .. قديمة.حاجتين بس حصلوا النهاردة لأول مرة النقاز عنده مشكلة شخصية مأثرة عليه تمامًا. كل الحاجات القديمة حصلت النهاردة مع بعض وفي نفس الوقت.الخلاصة .. فريق الزمالك قوي ومستقر بس عنده مشاكل لا أراه يسعى لحلها بل أراه معتمد على أن في كل ماتش أكيد مش كل المشاكل هتحضر كلها فالدنيا هتمشي .. اهي ممشيتش.الزمالك لازم فنيًا يعالج حاجات كتير ونفسيًا ميسمحش للهزيمة تلقي بظلال نفسية أبعد من نتيجتها الرقمية وتأثيرها على وضعية المجموعة اللي لسه فيها ١٥ نقطة في الملعب".