علّق الإعلامي أسامة كمال، على ما حدث داخل اتحاد الكرة اليوم، قائلًا «بلغة الشارع أو بلغة الناس في الكورة، هيتلم في لحظة ما وهنشوف مصالحة بشكل أو بآخر، لكن ليه وإزاي وصلنا له؟ مش عارف».وقال "كمال"، خلال تقديمه برنامج "مساء دي ام سي"، المُذاع عبر فضائية "دي ام سي"،: «السؤال الأهم هل اللي حصل مرشح إنه يحصل تاني بين طرفين تانيين؟ في اعتقادي أيوة مرشح، لأن طالما السابقة حصلت فهتتكرر وما فيش حاجة هتمنعها، ومش بقول هتتكرر في مجال الرياضة، لأ هنشوفها في مجالات تانية والمرشح الأول ليها مجال السياسة».وتابع: «مش هقول زي بعض الناس مطلوب تدخل الرئيس، لكن هقول مطلوب تدخل المجتمع، والتدخل بأشكال كتير، أولها إن الموضوع ما يتحولش لفكاهة ولا يتحول لواحد يقول الطرف دة على حق والطرف دة غلطان».وطالب "كمال"، المجتمع برفض ما حدث اليوم داخل الجبلاية أشكاله، قائلا: «المطلوب نحافظ على نفسنا ونمسك أعصابنا والا هيبقى ايه الفرق بين ناس محترمة ولها وزنها في المجتمع والجزار اللي في القناطر اللي اتخانق مع طالب فضربه بساطور في وشه وهرب».