ناشد أهالى منطقة أرض اللوا مسئولى محافظة الجيزة التدخل السريع لإنقاذهم من انتشار القمامة فى الشوارع العامة، والتى تتسبب فى مشاكل وخيمة.يقول «عم نسيم» البالغ ٧٠ عاما، أحد سكان المنطقة: «الريحة صعبة فى المكان هنا ده غير الحشرات المتكونة بسببها، ومبهدلانا والمنظر ده غير آدمى بالمرة».وأضافت «أم ماجدة» البالغة ٢٦ عاما، «أنا مريضة صدر وعندى حساسية شديدة والقمامة سبب رئيسى فى انتشار الناموس والذباب فى المكان، ولما بستخدم مبيدات حشرية بتعب صحيا جدا، وفى نفس الوقت مش قادرة أقاوم الحشرات دي، طب أعمل إيه».ويضيف: «أبومحمود» البالغ ٦٠ عاما «بصراحة دى مش عيشة ترضى حد، ولما أنزل أجيب طلبات بيتي، ألاقينى ماشى فى وسط القمامة، ده يرضى مين، لازم يكون فى حلول بدل العذاب إلى احنا عايشين فيه ده حرام».ويستكمل: «عم منير»،البالغ ٥٥ عاما، «مجرد فتح أى منفذ للبيت أصطدم بريحة القمامة، ومجرد ما أشوفها قدامى نفسى بتتسد، ده غير الحشرات إللى بتدخلى وتبهدلنا بجد أنا بعانى معاناة كبيرة من القمامة دي، ياريت الحى يكتر صناديق فى كل مكان، وحد من عمال النظافة يأخذها كل يومين، بدل ما بنمشى وندوس عليها كدة».واختتم سكان شارع مخازن الأنابيب بأرض اللواء بمناشدة المسئولين، مطالبين بحل لما يعانونه من انتشار القمامة.