يا هلا ومرحبا ومسهلا، يصبحكم ربي ويربحكم بكل خير وسعادة ان شاء الله، اشعليكم عقب اربعة ايام بتييكم عطلة اشحلوها بهالجو اللي اييب العافية، يعني الوضع بفضل الله ومنته عال العال ان شاء الله، بس ها ما اوصيكم الركاده وايد مطلوبه بهالأيام، وخاصة يوم 25 و 26 كلش ملش ما نبي ترقص بالشوارع وتحذف بالونات ماي على روس الأوادم، وما نبي ترشرش مياه تدرون الشوارع ماهي ناقصة غرقه زود عن اللي فيها. استانسوا واحتفلوا بس بركاده ورزانه من غير اصراخ وامهايل وتسكر شوارع، والأهم من هذا كله من غير امزارد والسوالف اللي اولها ليش اتخوزر وتاليها انتقل الى رحمة الله فلان الفلاني، ولا تم فضخ اصماخ فلنتان الفلنتاني والسبة خزة بطرف عين. اليوم يا محفوظين السلامة هذرتي عليها طلب وايد خاصة من امهاتنا الله يحفظهم ويطول بعمارهم اللي ما عندهم بيع برد، وعندهم الكويت وسمعتها واهلها خط احمر، علشان جذي وايد ضايق خلقهم ووايد موعاجبهم الحالة الكسيفة اللي وصلنا لها بسبة بعض النماين اللي ربي عاقبنا بوجودهم معانا ومحسوبين علينا كويتيين، مع ان كلامهم وتصرفاتهم ماله شغل بالهوية الكويتية بس الواحد شقول هذا بلى عقاب وطوايفه. فاشيليستا أصيلة وثانية مو أصيلة! انا اليوم ماراح اتكلم عن هالفاشيليستات وعمايلهم وسوالفهم وتفاهاتهم اللي يقصون فيها على النماين اللي ينهارون على الكشخة الغلط بكل شي، واللي للأسف بدت حياتهم تصير مسخ مليق لحياة هالفاشيليستات بكل شي بداية بعوية الحلج والكلام اللي ما يتعدى ثلاث كلمات خيال وموصج ولا يطوفكم، ولا انسى بعد بنت عمهم امبيه، مرورا بالتنهوص والترقص بالسيارات على الدنابك وغيرها على اساس ان هذا الشي وايد كشخة ووايد عجيب، بما ان الفاشيليستا الفلانية سوته ولزوم الكل والجميع يسوي نفسها، هذا غير حب الذات اللي طلع فجأه لدى بعض البنات اللي عقب سنين وبنين عاشوها باستقرار مع رياييلهم وعيالهم، الحين يبون يعيشون حياتهم ويشوفون سعادتهم اللي طبعا يشوفونها بحياة هالفاشيليستات بالسفر والفلوس والفراره من مطعم لي مطعم ومن قهوه ليمن الثانية من يصبحون ليمن يمسون وغيرها من توافه الأمور اللي تارسه حياتهم ربي لا تبلينا. اليوم انا بهذر وبقط اللي بقلبي وبقلب وايد من اهل الكويت، وارد واقول واكرر احط تريليون خط احمر تحت اهل الكويت لأني اقصدها واعنيها، وبتقولون عنصرية وطبقية وغيرها من الحجي اللي لا يودي ولا اييب، بقول ايه عنصرية وطبقيه وانانية بحب الكويت وخوفي عليها وعلى اهلها ومثلي وايد، فإحنا مالنا يد ولا حيله بوجود الفاشيليستات وتوابعهم قفه ولا باللي يسوونه من نون وما يعلمون، بس لنا شغل لمن هالنماين من حزب قعدني بدينار ونومني بعشرة اللي ما يندرى من وين يايه تطلع وحده فيهم تقول بكل اريحية انها الفاشيليستا الوحيدة الكويتية بطن وظهر، بمعنى ثاني الأخت تقصد انها الفاشيليستا الوحيدة الأصيلة والباجي لا. ســـــــتوب! الصراحه مادري شقول مادري شخلي مادري شسوي بعمري، مادري شفسر هالكلام الماصخ الباسج اللي كلش ماله داعي، واللي يضيق الخلق ويكدر الخاطر، ما ادري هالأخت الكريمة اللي تقول انها فاشيليستا بطن وظهر وتطل بعد على خمس شوارع وعندها ارتداد يطرد فيه الخيل. الصراحه مادري اشلون تجرأت انها تقول هالجملة، وما ادري شنهي درجة اليراعه اللي فيها واللي اتخليها تتلصق بالكويتيات وتنسب نفسها لهم. انا بس ابي اقول حق هالفاشيليستا واللي على حبلها واللي مثلها واللي يقلدها واللي يفكر انه يطري الكويت وبناتها بنص حرف، ترى كلمة انا كويتية مو سهلة ولا تمر مرور الكرام ولا هي جواز مرور كل من يشيله ويمشي، لأن الكويتية بنت الأصل بنت بطنها عمرها ما تستعرض روحها ولا حياتها على الملأ وتخلي المتردية والنطيحة يبلغون شفهم بدهاليز حياتها ويكشفون بيتها ووين تروح ووين تيي، الكويتية بطن وظهر ما تقول عندي وما عندي، وشريت وحطيت لأنها ما تحتاج لأن معروف شنهي اهي ومنهي اهي وشنهو عندها، والأهم من هذا كله انها اهي اللي تزين الشي مو اهو اللي يزينها ويخليها كشخة، الكويتية بنت التخ بن المخ بنت العز اللي شايفه خير ما تمشي على مبدأ هاته من لهاته اللي انتو ماشين عليه، واللي حتى رياييلكم وعيالكم ويدانكم بعد دشوا بالخط عقب ما شافوا الأنواط تتحاذف والغسيل شغال عن بكرة ابيه، الكويتية بنت البطن والظهر اللي يرتجون عليها حزت الحزه واللي اهي عن الف ريال ما عندها مياعه بالكلام وعوية حلج ولا تبلغ نص الكلام واهي تتكلم على اساس انها دلوعة وهند رستم زمانها مثل ما تسوون، الكويتية بنت الأصل والفصل يفزون لها اكبرها واسمنها ان دشت بأكبر المجالس تقديرا واحتراما لها وسنعها ومنعها، مو تطرد امطارد ورا الدينار علشان اتفج حلجها وتقول هذا ناطع وهذاك خيال وغيرها من جملكم اللي تقصون فيها على خلق الله، الكويتية من عمرها سنعة ومحترمة وشايفة خير وعمرها ما تستهزئ بالأوادم وتحذف عليهم قواطي روايح ولا حمر مثل ما البعض يسوي واللي للأسف لاقين لهم ناس تفتح ايدها وتلقف اللي يحذفونها بس علشان بلاش، الكويتية يا حضرة الفاشيليستا ام ظهر وبطن شي وايد كبير عليج ووايد صعب انج تفهمينه ووايد خطر عليج ان تتلصقين وتقولين انج اتمثلينها، لأن الكويتية الأصيلة المأصلة محد يوصل مرايلها ولا احد يقدر يقايشها. ركدوا من باب سووا خير وقطوا بحر وعلشان اعمم الفائدة للنماين المتفشلسته، ابي اقول ركدوا مدام النفس عليكم طيبه للحين، ركدوا وعينوا من الله خير ولا تفتحون على روحكم بيبان امسكره وما يندرى اشلون بتسكرونها لأنكم مو قدها، ركدوا واياني وياكم اتييبون طاري الكويتية ولا الأصل والفصل والبطن والظهر خليكم بهذا العطر خيال وهذي الصمونة لذيذة، وهذا الكونتور موصج علشان اتعرفون تترسون حساباتكم اللي تنغسل يوميا، لأنكم عمركم ماراح تقدرون توصلون مواصيل الكويتية بنت الأصل والفصل، لأن بنات الظهر والبطن ينضرب فيهم المثل بالسنع والأخلاق والرقي والعين المتروسة واحترام الناس، غير انهم عمرهم ما يهايلون بالسكيك علشان الأنواط، اتمنى الرسالة اوصلت وبديتوا تركدون. روابي البناي