قال المخرج الشاب أكرم البزاوي نجل الفنان محمود البزاوي: إن والده كان بيكتب بعض الأعمال الدرامية من الباطن خلال السنوات الماضية وإنه كان يستاء من ذلك، إلا أن رد والده عليه بأنه يحاول أن يجتهد ليصل إلى حلمه. ونشر أكرم تدوينة له على حسابه الخاص بموقع التواصل الاجتماعي "فيس بوك" قال فيها: "زمان كان بابا بيكتب أعمال كتير من الباطن وكان بيبقى موافق أن اسمه ماينزلش وكنت أنا ببقى زعلان وأمشي أقول لكل الناس أن أبويا اللي كاتب الفيلم أو المسلسل ده ويقولولي أنت أهبل هو فين اسمه.. وكنت أقوله طب ما أنت كده عمرك ما هاتنجح ماحدش يعرف أن أنت اللي بتعمل ده ؟ وكان هو يقولي مش مهم بس أكيد الاجتهاد ده هايوصلني لحاجه.. وكانت حتى عدد أعماله في التمثيل مش كتير". وأضاف: "وبعد فتره يعمل دور الريس صديق ويضرب وانا قبلها قولتله مساحة الدور دي هاتوديك في داهيه وانا طلعت حمار كالعادة الحمدلله.. وطبعا المفاجأة الكبرى في رمضان قبل اللي فات واللي فات صلاح الطوخي.. وبعدها دوره في سابع جار مجدي الصافوري النصاب الحبوب.. وحاليا بقى دور الريس زكريا اللي أنا حبيته أكتر من أبويا شخصيا وحبيت نظرات خوفه على بنته وهدوئه حتى وهو منفعل.. مبروك يا بابا لأنك مجتهد". يشار أن الفنان محمود البزاوي يشارك في بطولة مسلسل "أهو ده اللي صار" مع مجموعة كبيرة من النجوم منهم سوسن بدر وروبي وهشام إسماعيل والمسلسل من تأليف عبد الرحيم كمال وإخراج حاتم علي.