أحيت الفنانة رانيا فريد شوقى ذكرى وفاة والدها ملك الترسو فريد شوقى والذى توفى في نفس اليوم عام 1998، وعبرت عن حبها له ورحيله إلى العالم الثانى بكلمات مؤثرة.كتبت رانيا عبر حسابها على موقع التواصل الاجتماعى فيس بوك قائلة: "يوم ٢٧-٧-١٩٩٨ يعني من ٢١ سنة والله ما عارفه إزاي بس رحمة ربنا هي اللي بتخلي الحياة ماشية وتكون أسرة، ويبقي عندك أولاد تتلهي في تربيتهم وعندك حلم بتسعى عشان تحققه وبتقابل ناس منهم الكويس ومنهم الوحش وتلاقي اللي بيطبطب عليك بكلمه تسعد قلبك رغم الحزن الخفي اللي جواك؛ لأنك فقدت جزءا من قلبك مع وفاة أبوك ودي حقيقة مهما ضحكت وسافرت واشتغلت فيه حته موجوعة بغيابه عني حضنه اللي كان بيحميني من العالم كله ونظرته اللي كلها دفئ وبتقولك خدي بالك من نفسك عشان خاطر بابا وضحكته اللي مازالت بترن في ودني وتهون عليا حاجات كتير افتقدتك اوووي عزائي الوحيد لما الناس بتشوفني تقولي يا بنت الغالي ويا بنت الملك الله يرحمه بفرح اوي وخصوصا لما اسمع حكاية عنك وعن طيبتك وخفة دمك وجدعنتك وانسانيتك ومش ناسيه جملتك اللي دايما كنت بتقولها الفن رسالة لازم تخدم المجتمع والناس وانت حققت المعادلة الصعبة البطل الشعبي اللي اثر في وجدان الناس بالإيجابيات واتعلموا منه جدعنة ولاد البلد وافلامه صنعت قوانين وحققت ايرادات كان الفيلم بيتباع بأسمك فقط فريد شوقي واخرون وقولتلي عمرك ما قطعت عيش حد ولا قولتلهم مش عايز البطله دي وكنت شايف أن دور الفنان لما يوصل للنجومية لازم ياخد بايد الشباب ويقدمهم ويطلع جيل جديد عمرك ما عرفت الانانية لا في فنك ولا حياتك الشخصية ربنا وهبك نعمة العطاء والمحبة".عارف لحظات نجاحي بالنسبة ليا فرحتها أني بحس أنك معايا شايفني وفرحان بيه بحبك أوي يا فريد اسم علي مسمي فعلا فريد الله يرحمك ويجعل مثواك الجنة ياااااارب".يذكر أن الفنانة رانيا فريد شوقى تشارك في مسرحية "الملك لير" عن رائعة شكسبير الخالدة وإخراج تامر كرم وترجمة فاطمة موسى، وبطولة مجموعة كبيرة من النجوم وياتى في مقدمتهم الفنان الكبير يحيى الفخرانى وهبة مجدى وأحمد فؤاد سليم وريهام عبد الغفور وأحمد عزمى وأيمن الشيوى ونضال الشافعى وناصر سيف وحمادة شوشة والموسيقى التصويرية للموسيقار مصطفى الحلوانى وتصميم الأزياء للدكتورة نيفين رأفت.