كتب الفنان أحمد السعدني منشورًا عبر حسابه الرسمي على موقع التواصل الاجتماعي فيسبوك، موضحا معاناته بعد وفاة أم أولاده. وقال السعدني في منشوره: "طول عمري مبيفرقش معايا كلام الناس، وكنت بلوم صحابي زي أحمد فهمي مثلا أنه بيقعد يشتم الناس اللي بتشتمه وأقوله إنت بتقرأ ليه أصلا كبر دماغك !! عمري ما اهتميت أقرأ التعليقات السلبية أو يمكن كنت محظوظ إني مكنتش بشوفها أو يمكن مكنش حد بيغلط فيا".وأردف: "الحقيقة معرفش الوضع كان إيه لكن بعد البوست الطويل اللي انا كتبته لصاحبة البوست حبيبتي وأم ولادي رحمة الله عليها ومكنتش مهتم إن حد يقراه ولا كنت عايز أعرف رأي حضراتكم فيه !! لقيت صحابي قالولي إن في ناس شتمتني، استغربت لأن اللي اتربينا عليه إنه لا شماتة في مواقف معينة.. بس مهتمتش برضه لئن اللي فيا مكفيني أساسا، والنهارده بالصدفة كنت داخل اكتب تعليق على مدرب الأهلي الجديد بحاول أكسر حالة الجمود اللي أنا فيها والحمدلله فشلت فشلا ذريعا إني أكسرها والفضل لناس المفروض إنهم متابعين ليا المفروض برضه إنهم بيحبوني يعني آمال متابعني ليه عشان يشتموني ؟؟.. كلام البعض واللي اعتقد مخدش منهم ٥ ثواني كتابة.. لكن الأكيد إنه خد وجع قلب وروح وخد من دمي وأعصابي اللي اتحرقوا كتير".وتابع أحمد السعدني: "انا لا حشتم ولا حعمل بلوك لحد ولا حقفل التعليقات أنا حرجع زي ما كنت أكتب وانزل صور لنفسي ولأي حد بيحبني وشخص محترم حتى لو اختلف معايا.. ومش عايز الهري ده ينسيني أشكر كل حد قريب مني وقف جنبي في شدتي وكل بعيد كان بيدعي للغالية بالرحمة لينا بالصبر.. والأهم اني اكتشفت وانا بكتب السطر ده اني كسرت حالة الجمود فعلًا الحمدلله والبوست اللي جاي حيكون عن المدرب بس شكل حظه أديله فرصة معايا اشوفه في الماتشات.. إلى لقاء مش قريب غالبا".يذكر أنه توفيت أمل سليمان طليقة أحمد السعدني يوم الجمعة 9 أغسطس الماضي، بعد تعرضها لأزمة قلبية حادة.