أنا صحفي رياضي.. ومن فترة كدة قولت ادخل مجال جديد واخترت انه يكون "السياحة" كنت فاكر الموضوع بسيط .. عادي شوية بحث على شوية مجهود هطلع مواضيع قيمة، بس اكتشفت ان الموضوع عبارة عن بحر واسع جدا كل ما تتعمق فيه، تفهم اكثر، تشوف الدنيا بمنظور مختلف، عملت موضوعين الأول كان إزاي تسافر سويسرا ب ٣ آلاف جنيه، والثاني رحلة إلى ٣ دول في أوروبا بأقل من ٥ الآف جنيه.. كنت فاكر ان ده قمة الإبداع.. بس اكتشفت انك ممكن تسافر ببلاش بدون ما تدفع ولا مليم، لا وكما مش بس كدة .. انت هتاخد فلوس كمان، شباب كثير بتفضل تقول انا نفسي اسافر واشتغل بره، نفسي اسافر أتفسح.. انا هخليك تعمل الاثنين .. جهز نفسك بكوباية الشاي او القهوة وأقرأ..إزاي تسافر ببلاش إلى أي مكان في العالم؟سنة ١٩٩٩ كان فيه شاب زي حالتنا كدة ظروفه صعبة،  أسمه ديريك إيرل، سافر من أمريكا إلى جنوب شرق اسيا لمدة ٣ شهور ولما بدأت فلوسه تخلص قرر انه لازم يشتغل ومن هنا كانت البداية.. دور على شغل وبدأ بتدريس اللغة الانجليزية في تايلاند، وبعدها اشتغل في الرحلات البحرية، ومن الوقت ده قرر انه ميرجعش لبلاده ويكمل في شغلته دي..ديريك سافر اكثر من ١١٦ بلد، داخل ٦ قارات، سافر لأكثر أماكن خطورة في العالم زي أفغانستان، وصل دلوقتي انه عنده موقع إلكتروني بيكتب فيه تجاربه في الرحلات البحرية ممكن تشوفه من هنا .. وكمان عنده شركة سياحة صغيرة بعد ما كان كل اللي بيكلمه ١٥٠٠ دولار، تخيل انه قعد في المياه ٦٧٣١ يوم يعني ما يقرب من ١٨ سنة! هيجي واحد يسألني أنا مالي بالراجل اللي اسمه إيريل ده؟هقوله بص ياسيدي في موقع إلكتروني مشهور اسمه allcruisejobs حاطط ما يقرب من ١٥٩٢ وظيفة في الوقت الحالي للرحلات البحرية، تخصصات عديدة، وظائف مختلفة، بالاضافة انها في شركات سياحة مختلفة يعني ممكن تلف العالم ببلاش!كل شغل هتلاقي وصفه بشكل بسيط، محتاج يبقى عندك دراية بالانجليزي، وفيه وظائف مش بتطلب ده، وكل وظيفة هيبقى مكتوب مقابل ايه.. يعني فيه وظائف بدون مقابل مادي، وفيه بمقابل وسيتراوح بين الف ل ٣ الاف دولار، وبتختلف برضة حسب وظيفتك، فيه وظائف بتحتاج دول محددة ودي هتكتشفها مع قراية كل وظيفة أنت شايف انك تصلح لها.. الإقامة هتكون فى كباين مشتركة أو لو انت حد شغلتك مهمة هتبقى لوحدك، الاكل ببلاش، ساعات العمل بتختلف بحسب طبيعة شغلك، وأقصاها 10 ساعات فى اليوم.السفر مش صعب بس محتاج بحث، السفر أسهل مما تتخيل بس تبقى عايز تعمل الخطوة دي، متقولش لأ صعب، متقولش أصل مش معايا فلوس، دور ودور ودور وفي النهاية هتعرف تسافر بأقل الأمكانيات