حل المغني "أبو" ضيفا على راديو "إنيرجي"، وتحدث في حوار مطول عن أبرز أعماله الفنية.قال ابو: بحب أسمع الأغاني الهادية وخاصة أغاني فيروز، لكني لما بغني بحب أغني أغاني ألحانها مبهجة. واضاف: قعدت 6 شهور بلف العالم بأغنية "3 دقات"، بعدها والدي تعب 6 شهور تانية، ودة كان سبب اختفائي لفترة، لكن بعد كدة رجعت بأغنيتين "عيش يا قلبي" و"حبيبي يا ليل".وتابع: زمان المنتجين كانوا بيفضلوا الألبومات عشان الناس تشتري الشرايط، لكن في الوقت الحالي الناس بتسمع الأغاني على اليوتيوب والأبلكيشنز، عشان كدة بنزل الأغاني بتاعتي سينجل مش في ألبوم.وقال ان أغنية عيش يا قلبي من تلحين ميمو، مالحنتهاش بنفسي لأن اللحن عجبني جدا واستأذنت ميمو إني آخده وأغني عليه الأغنية مع بعض التعديلات.واشار الى ان عزيز الشافعي من أكتر ملحنين الجيل الحالي اللي بحبهم وقريبين مني، لأنه متنوع وألحانه بتوصل للناس بسهولة مضيفا " الأغاني السينجل بتاعتي هطرحها قريب في ألبوم اسمه "شربات"، على اسم الأغنية اللي هتنزل الفترة الجاية واللي بعتبرها أفضل حاجة كتبتها بنفسي".واضاف "اسمي الحقيقي محمد أبو العينين، أول من سماني "أبو" كان صحابي في المدرسة، وأخويا سموه "إبو". وتابع: هكون أب قريب وبتناقش مع زوجتي على اسم البنت، ومحتارين ما بين اسم داليدا أو كاميليا.وتابع: يسرا وتامر حبيب ومريم أبو عوف أقرب ناس ليا من أصدقائي في الوسط الفني. مضيفا "احتمال اتجه للتمثيل الفترة الجاية وخدت ورش تمثيل بالفعل، جالي عروض قبل كدة لكني ماقبلتش لأني حابب أركز حاليا في الغناء أكتر".وقال "اتأثرت بفريد الأطرش من فنانين الزمن الجميل، وبأم كلثوم من فنانات الزمن الجميل. واضاف: بحب بهاء سلطان جدا ومتأثر بيه، ومتعود أغني أغانيه.وتابع: حضوري فعاليات مهرجان موازين كانت تجربة ممتعة جدا، والمغرب من أجمل البلاد في العالم مؤكدا ان يسرا إنسانة ماحصلتش، اتعلمت منها إنها دايما بتستفتي قلبها ومش هاممها حاجة في الدنيا وأحب جدا إني أكرر تجربة العمل مع يسرا بعد تعاوننا في 3 دقات، وأتمنى إنها تغني أغنية من ألحاني وكلماتي.وقل ان الغناء مش طرب، لكن الغناء حالة بتفرض نفسها على المستمعين مضيفا "بحب جدا طريقة تعامل أمير عيد والعسيلي مع الجماهير على السوشيال ميديا".وتابع: مابدأتش مسيرتي الفنية كمغني، بدأت ككاتب وملحن بعد كدة قررت أغني وبحب إن الأغاني اللي بكتبها يكون فيها حدوتة، الأغنية بتكون أحلى والإنسان بيحب الحدوتة بطبيعته وبحب أغنية "خطوة" جدا واتمنيت لو كانت بتاعتي، لكنها لايقة على مصطفى حجاج أكتر مختتما "نفسي أعمل دويتو مع محمود العسيلي أو مصطفى حجاج أو أمير عيد".