دعم الفنان تامر حسني صديقه، المطرب والملحن رامي جمال، بعد إعلان الأخير إصابته بمرض "البهاق" عبر صفحته الرسمية على "فيس بوك"، موجهًا كلامه لجمهوره، ونشر تامر حسني صورة تجمعه برامي جمال على حسابه الشخصي على "إنستجرام".وكتب تامر على الصورة قائلًا: "إلى الفنان الكبير والصديق الحقيقي والمحترم رامي جمال يا حبيبي أنت فنان كبير ومحبوب وليك قيمتك وكل الناس بتحبك ومفيش حاجة هتعطلك عن نجاحك، وتعبك دا لاهو مؤذي ولا مُعدي وكل الناس جواها تعب في منه اللي ظاهر وفي منه اللي مش ظاهر حتى لو كان تعب نفسي أو مادي كل شخص جواه وجع من حاجة معينة.. المهم أننا نبص ونتعلم من اللي ظروفهم أصعب مننا ورغم كدا عندهم صبر وبينجحوا في الاختبار وبيقولوا الحمدلله ومكملين وعندهم إرادة وبينجحوا أكتر من الأول".وأضاف تامر: "لازم تكمل نجاح يا رامي وشيل أي هلاوس من دماغك واوعى تخبي نفسك اللي بيحبك بيحبك لشخصك وفنك.. صدقني دي حاجة عادية يا رامي والله ملهاش أي تأثير لا عليك ولا على جمهورك بالعكس بقى أنت أكيد شايف الناس كلها طيبين إزاي ونفسهم يفرحوك وبعدين افتكر إن مايكل چاكسون جاله نفس اللي جالك وبقى أسطورة مبتتكررش خااااالص وانت فنان وعارف...أنا واثق إنك مؤمن وبتحمد ربنا وهتقوم وهتكمل وهفكرك قدام كل الناس اللي شايفه كلامي إنك هتنجح أكتر وأكتر وربنا هيكرمك أجمل كرم وهتشوف قريب.. بحبك يا رامي".وفاجأ المطرب رامي جمال متابعيه على موقع "إنستجرام"، بإعلانه منذ عدة ساعات، إصابته بمرض البهاق، وذلك بعد ظهور بقع بيضاء اللون بمناطق بجسده، دون أن يجد له علاجا.وقرر رامي جمال أن يشارك الجمهور الأمر ليضع حلين أمامه إما الاعتزال أو أن يتقبله الجمهور بهذا الشكل.