ناشد أهالى شوارع داير الناحية وحازم البطوطى والنيل الأبيض بمنطقة ميت عقبة، بمحافظة الجيزة، المسئولين بالحى استكمال رصف وهيكلة الشوارع التى تركها العمال دون رصف منذ أسبوع ومواجهة حالة الإهمال الشديد التى تعانى منها أرصفة الحوارى الجانبية بعد تهالكها وزيادة عدد أعمدة الإنارة خاصة في الشوارع الجانبية، وطالبوا المسئولين بجولة تفقدية للمناطق ليشاهدوا كم الإهمال الموجود داخل المنطقة، والعمل على حل المشكلات التى تواجه الأهالى بالمنطقة.يقول «عماد حسنى» أحد أهالى شارع داير الناحية بمنطقة ميت عقبة، «العمال مشيوا من غير ما يكملوا رصف باقى الشوارع وبقالنا أسبوع على الحال ده، مؤكدا أن معظم الشوارع عملوا فيها جنب واحد وسابوا الباقى والأجحار متراصة بطول الشارع وعاملة إشغال لنص الشارع».ويتابع، بعد أن كان الشارع مليئًا بالحفر والمطبات، المسئولون تكرموا وعملوا إعادة رصف للشوارع المفروض بقى يكملوا الجميل بتاعهم ده عشان يبقى منظره حضاري، مضيفا لازم المسئولين بالحى ينزلوا ويشوفوا بنفسهم المشكلة ويحلوها قبل دخول فصل الشتاء، عشان المطر بيغرق الدنيا هنا والناس ما بتعرفش تمشى، خصوصًا كبار السن عندنا، والأطفال اللى بتروح المدارس وهدومهم بتغرق مياه من المياه اللى بتكون في الحفر دي. ويضيف محمد عمر، أحد سكان شارع حازم البطوطى بمنطقة ميت، الحوارى الجانبية بتكون ضلمة كحل بالليل عشان عدد الكشافات قليل وكل ٥٠ مترا تلاقى كشاف ودى مشكلة كبيرة بتواجهنا، مؤكدا أن الأهالى يلجأون إلى تركيب كشافات ولمبات صغيرة أمام منازلهم ومحلاتهم خوفا من السرقة.ومن جانب آخر قال عطية محمود من سكان شارع النيل الأبيض: «موظفين الحى كانوا هنا من شهر ووعدونا أنهم يحلوا كل المشكلات والأزمات التى تعانى منها المنطقة وبالفعل هما حصروا الشوارع اللى محتاجة رصف ومحتاجة إنارة، لكن الحقيقة هما قاموا برصف بعض الشوارع وتركوا الباقي، أما الكهرباء غيروا كام لمبة ومشيوا.