صحَّ النوم يا اتحادنا العزيز.. يا خوفي أن يكون البيان اللي صدر من اتحاد الكرة ضد أحداث الملاعب الإيرانية لتحريك الاتحاد الآسيوي بعد ما طارت الطيور بأرزاقها وشربت كل أرض ماءها، ويا اتحادنا الموقَّر اتأخّرت كتير فالهلال خسر بفعل فاعل ولحق بيه الأهلي، ونحنا يا دوب صدّرنا بيان!! إخوانّا المصريين لما ما تعجبهم شغلة يقولوا عليها «كوسة»، ونقول بصريح العبارة اختيار الأسماء المتنافسة على الكرة الذهبية لدورينا فيها ما فيها وعليها ما عليها، وفهمونا يا ناس تيسير راح فين وسلمان الفرج معاه كمان؟ اتنين نجوم بحق وحقيق أفضل من نيفيز ومعاه ماركينهو. عضو اتحاد الكرة الدكتور عبداللطيف بخاري يبرر بأن اختيار المرشحين للكرة الذهبية تم بالكمبيوتر وسلّم لي على الكمبيوتر، هي حديدة زي ما تدخّل لها معلومات تعطيك نتائج.. وفي المدربين بانت الرضوى والتراضي خد معاك مدرب الأهلي والنصر والاتحاد يعني غالبية الأربعة الكبار، فبيتوركا ما له مكان نتائجه سلبية ولا كمان الكمبيوتر؟!! آخر مستجدات اتحاد الكرة أبو قرش يطلع أبو قرشين فعقوبة فابيان 6 مباريات اتحوّلت إلى 6 أشهر وهذه المرة مش كمبيوتر.. العلة في الترجمة، إذا كانت أمانة الاتحاد تترجم خطأ كيف حتتعامل مع الاتحاد القاري والفيفا وكيف حتمشي أمورها؟!! نكون حقانيين ونقول الخطأ وارد لكن فين المراجعة والتدقيق ولا الشغل دعه يعمل دعه يمر؟! الاتحاد من حفرة لدحديرة.. وسط غمرة الصفقات اللي رجّعها البعبع من جديد فجأة طلعت قضية مانسو.. يا إتي وقِّف الصفقات وعليك السداد، والمشكلة الاتحاد وقَّع مع اللاعب والأهلي فاوضه وقرار اتحاد الكرة زمان الاتنين في الهوا سوا، يا عجب العجاب دارت الأيام وبانت الحقيقة بالتمام وشيل يا اتحاد!