قام الفنان أحمد فريد بمساندة صديقته الفنانة داليا البحيري، بعد أزمتها الأخيرة، بسبب المنشور الذي قامت بكتابته عبر حسابها الرسمي التي أعلنت فيه استيائها ممن لا يلتزمون بالحظر المنزلي .كتب أحمد فريد منشورًا عبر صفحته الشخصية على موقع التواصل الاجتماعي "فيسبوك"،قال فيه:"بقالي فترة منعزل تمامًا عن كل الأخبار والأحداث اللي بتحصل على سوشيال ميديا لانشغالي التام لظروف خاصة جدًا ووفاة الغالية چودي، والدة صديقتي دنيا عبد العزيز، ومافيش كلام ممكن أقوله على چودي من كتر نقائها وحبي ليها وغلاوتها عندي ووفاتها بالنسبالي صدمة".وتابع أحمد فريد قائلًا :"النهاردة اتصدمت وفوجئت من التحفيل والهجوم بطريقة غير أخلاقية على الفنانة داليا البحيري، واللي يعرفني هيعرف مدى علاقتي وقربي منها وبعتبرها أختي".وأضاف أحمد فريد قائلًا: "أنا قريت البوست اللي هي كتبته على الأكونت الخاااص بتاعها يعني تتكلم براحتها وتقول اللي عاوزة تقوله، وبالرغم من كده هي اتكلمت في موضوع استفزها ومستفز ناس كتير محبوسين ومحرومين من الخروج لالتزامهم واحترامهم بقوانين الدولة والموضوع مالوش أي علاقة بالعمال والعمالة خالص والمقصود هم ناس اللي بتنزل تعمل شوبينج وخروجات ومقضينها ومش ملتزمين وبقوانين الدولة وعندهم لا مبالاة ولو حد اعترض عليهم وطالب بالحظر الكُلي هيجيبوا سيرة الغلابة وقلبهم على العمالة اليومية يا حرام وقلبهم متقطع عليهم يعني من الآخر بيتحاموا تحت شعارات إنسانية تلعب على مشاعر الناس زي بالظبط اللي مش بيركعها ولا بيصلي وقلبه متقطع على إغلاق المساجد، هي بقى تقصد نوعية الناس المنافقة دي لأن داليا هي اللي عاملة إعلان بنك الطعام لمساعدة العمالة اليومية".واستكمل أحمد فريد كلامه قائلًا: "كون إن في صحفي لا يمتلك أخلاق المهنة موجود في لستة أصدقائها والمفروض إن الأصدقاء اللي عندها تعرفهم بشكل شخصي، فياخد جملة واحدة بس من مضمون البوست،ويعمل بيه تصريح صحفي يسيء ليها ويهاجمها ويستفز الناس الغلابة فده اسمه انحطاط أخلاقي وانعدام أمانته ومصداقيته وعدم احترام مهنته،ده واحد سمع كلام ونقل الكلام غلط وغير فيه، اللي مايعرفش داليا البحيري فهي من أنضف وأطيب الناس في الوسط الفني وواضحة جدًا ومش بوشين، بيتها مفتوح للناس دايما وخيرة وكريمة جدًا ومتواضعة جدًا والناس الغلابة نقطة ضعفها".وانهى أحمد فريد كلامه قائلًا: "من فضلكم تتأكدوا من خبر قبل التصديق والنشر وردود الأفعال القاسية والجارحة وانت خلي عندك ضمير وراعي ربنا في اللي بتعمله،يَا أَيُّهَا الَّذِينَ آمَنُوا إِن جَاءَكُمْ فَاسِقٌ بِنَبَإٍ فَتَبَيَّنُوا أَن تُصِيبُوا قَوْمًا بِجَهَالَةٍ فَتُصْبِحُوا عَلَىٰ مَا فَعَلْتُمْ نَادِمِينَ صدق الله العظيم، فضلًا وليس أمرًا اعملوا شير للبوست عشان الناس تعرف الحقيقة".والجدير بالذكر أن الفنان أحمد فريد يخوض السباق الرمضاني المقبل من خلال مسلسل" فلانتينو"،وهو من تأليف أيمن بهجت قمر،إخراج رامي إمام،بطولة عادل إمام،دلال عبد العزيز،داليا البحيري،جميل برسوم، إلهام عبد البديع،سليمان عيد.