شهد ميدان الشارع الجديد بمنطقة السلام واقعة مأساوية راح ضحيتها صاحب محل سوبر ماركت بسبب 85 جنيها بعدما قتله عامل بمنطقة مدينة السلام لمطالبته له بدفع الأموال المتأخرة عليه جراء حصوله على سلع غذائية منه بمدينة السلام، وحرر محضر بالواقعة وتولت النيابة التحقيق. وحصلت "البوابة نيوز " على نص التحقيقات في واقعة القبض على " على عبدالمعبود"، ٣٤ عاما، لقتله مالك سوبر ماركت بسبب مطالبته بسداد ٨٥ جنيها الأموال المتأخرة عليه، وتم إحالته إلى النيابة التي باشرت التحقيق معه وبسؤاله عما حدث معه: س: اسمك وسنك وعنوانك؟ج: على عبد المعبود ٣٤ عاما قهوجى وساكن بمنطقة السلام. س: ماقولك فيما هو منسبوب إليك بقتلك "عباس محمود" عمدا مع سبق الإصرار باستخدام أداة "زجاجة" وأحدثت به الإصابة المؤدية لوفاته، وإتلافك المنقولات المملوكة للمجنى عليه؟ ج: محصلش، أنا وقعت على صناديق البيبسي اللي ورايا فالحاجة اتكسرت. س: ماقولك في أنك متهم بإحرازك بغير مسوغ قانونى أو مبرر أداة مما تستعمل في الاعتداء على الأشخاص "زجاجة"؟ج: أيوه دا حصل. س: ما قولك فيما قاله شاهدا الرؤية "صلاح، على " بإبصارهم لك حال تعديك على المجنى عليه؟ ج: أنا حدفت الإزازة على المجنى عليه عندما رفع عليا الشومة والإزازه مجتش فدماغه.وكانت قد استمعت النيابة لأقوال زوجة المجنى عليه "ايمان" ٤٣ عاما وبسؤالها: س: ماتفصيلات ما حدث؟ ج: اللي حصل إن زوجى اتغدا فالبيت ونزل الساعه ٧ مساء لفتح الماركت وبعدين انا اتصلت اطمن عليه الساعه ٨ مساء ولما رد عليا لقيت صوت دوشه نحوه، ولقيته بيقولي الحقيني بالنضاره التانيه بسرعه فسئلته في ايه قالي أخلصي وتعالي بسرعه، جريت بسرعه روحتله ومعايا العيال ولما وصلت لقيته سايح في دمة ومتعور في دماغه من ناحية اليمين، ولقيت المحل كله متكسر والدم في كل حته، وسئلته ايه اللي حصل قالي الست ام عبده كان عليها ٨٥ جنيه ولما طالبتها بالفلوس راحت اشتكت لجوزها وجيه هو وعياله ومعاه صاحبه وكسرو المحل وفتحو دماغه بأزازه حاجه ساقعه.وأضافت زوجة المجنى عليه في التحقيقات: "زوجى قالي هروح الصيدليه علشان اشوف الجرح ولما وصل الصيدلي قاله لأ الجرح محتاج خياطه وبعدين راح هو واحد صاحبه واتصلت اطمن عليه رد صاحبه وقالي متقلقيش هو جوه بيخيط الجرح ومعلقينله محاليل، وبعدين صاحبه اتصل بابنى وقاله تعالي أبنى راح، وبعدها لقيت جوزى بيكلمنى وبيقولي لمى الحاجه اللي فالمحل واقفلي واطلعي البيت وفعلا عملت كده". واختتمت حديثها قائله: " وبعدما روحت المستشفي لأطمن على جوزى لقيته فالأنعاش وبيحاولو يفوقوه ومكنش بيتحرك ومقدروش يفوقوه ومات، وانا بتهم الست اللي اسمها ام عبده انها قومت حوزها على لضرب جوزى وهما السبب في وفاته. كما أن النيابة قد أستمعت لشاهد العيان على الواقعه وهو صلاح عمر وهو جار المجنى عليه وبسؤاله عما حدث قال: س: ماتفصيلات شهادتك على الواقعه ؟ ج: اللي حصل ان انا سمعت هيصه وانا في بيتى ولما بصيت لقيت المتهم على بيجرى على المجنى عليه ويحمل " زحاجه" ولما نزلت من شقتى التى فالدور الثالث لقيت المجنى عليه متعور في دماغه وسايح في دمة والناس بتحوش عنه والناس اتلمت وحجزت بينهم، وبعدين سمعت من الناس اللي كانت واقفه ان الموضوع له علاقة بفلوس حاجات كانت الست مرات الرجل المتهم بتاخدها شكك بالحساب الآجل وبعدين المجنى عليه راح علشان يخيط دماغه وبعدها علمت بان المجنى عليه توفي من رجال المباحث عندما حضرو لأبلاغي بانى شاهد على الواقعه وأرادو أقوالي. وكانت البداية بتلقى قسم شرطة السلام، إخطارا من المستشفى بوصول "ع ب" 40 سنة صاحب محل سوبر ماركت، جثة هامدة إثر إصابته بنزيف داخلى وكسر في الجمجمة، انتقل رجال المباحث لمكان الواقعة وتبين من التحريات والتحقيقات، أن وراء الواقعة جار المجنى عليه، حيث نشبت بينهما مشادة كلامية تطورت إلى مشاجرة أحضر على إثرها المتهم زجاجة مياه غازية وضرب بها المجنى عليه على رأسه وسقط غارقا في دمائه.