علق الملحن الكبير حلمي بكر، على مسألة الزواج بين بنت صغيرة ورجل كبير، قائلا: "يوم ما أي اتنين بيتقابلوا مش بيقولوا لبعض سنك كام سنة، ولكن اللي بيحصل بينهم نقاش، واللي انفصلت عنهم أصدقائي، وفي منهم اللي عاوز يرجعلي، وفي علاقات كتيرة ناجحة مع فارق السن الكبير".وأضاف بكر خلال لقائه ببرنامج "شيخ الحارة"، مع إيناس الدغيدي، على قناة القاهرة والناس: "في مغنيين كتير نفسي أقعدهم في البيت بس لو قولت اسم حد منهم هشهره وهنجحه وهخليه يرفع أجره، المطلوب من المطربين القبول والذكاء والإدارة".وقال حلمي بكر تعليقا على رغبة حمو بيكا في أن يلحن له: "هو عرض عليا وأنا رفضت.. ربنا يوفقه.. المسيرة ماشية والطابور طويل.. في مطربين نجحوا بالضجة.. يعنى مثلا أنا بحب صوت شيبة ورضا البحراوي وبيعبروا عن الشعبية".وتابع بكر: "بيكا عرض عليا فلوس بس أنا مش هفيده.. كان في نظام اتعمل زمان في نقابة الموسيقيين بالنسبة للمنتسبين، ولكن النقابة بدأت تتصدى لهم، وأنا أرفض شعبة الغناء الشعبي، فهل الحرامي له شعبة؟".وعلق بكر على وجود مغني شعبي مثل سعد الصغير قائلا: "زمان كان في شكوكو وإسماعيل ياسين ماتخرجوش من معاهد، بس كانوا موهوبين، وثقفوا نفسهم بنفسهم، وهو ما ينطبق على سعد الصغير، واللي قبلته لأن لديه قبول ودمه خفيف والأفراح كلها بتطلبه دلوقتي".وفى فقرة "سيرتك على كل لسان"، قال بكر: "لا أمتلك ثروة، ولو غيرت أسلوبي هعمل فلوس قد كده، ماقدرش أساعد المغنيين دول، طالما الأساس مش كويس، ووقفت جنب أصوات كتيرة موجودة دلوقتي، بس مش كل من هب ودب هقوله وهقف جنبه".