سمعت وقرأت كغيري مقترحا بأن تقام قمة السوبر والتي ستجمع النصر بالهلال في مدينة الضباب لندن. طبعا ربعنا إذا أحبوا يلمعوا شيئا ويرسلونه إلى الفضاء الخارجي قالوا من أجل استثمار افضل! والاستثمار اللي يتكلمون عنه سيجلبه لهم جمهور غفير يتواجد في لندن في ذلك الوقت من اجل السياحة. شوفوا عاد إن كنتم تتحدثون عن العوائد وإن الحضور اللندني راح يفوق حضور استاد الملك فهد بسبب إن الناس معظمها في لندن وباريس وفيينا وتركيا فهذا وهم وكلام معلب لا يختلف عن حزاوي البوابات الإلكترونية اللي اصبحت حكاياتها مثل حكاية بيض الصعو نسمع عنه وما عمرنا شفناه، ومثل قصة ترميم استاد الأمير عبدالله الفيصل اللي اصبح من الاطلال وتاريخه يرويه لنا جيلا أصبح اطلالا ايضا! اقول العقل زين بلا لندن بلا بطيخ اللي في لندن طبقة مخملية اعتادت كل سنة على التصييف هناك والسياحة في دول تجاور لندن! اللي في الرياض وما جاورها هم السواد الأعظم وحضورهم مضمون والملعب راح يصير فل الفل قبل بداية اللقاء بساعات! هذا نصر وهلال ومنذ أيام التراب والأسود والأبيض ملعب الصائغ يمتلئ عن بكرة ابيه منذ الظهيرة! أمر آخر مهم فكروا فيه قبل ما تجي الفاس في الراس. في الملز او استاد الملك فهد ترمى قوارير. بصق أعزكم الله. كف طاير. يافقراوي. يا زعيقي. جح فلي..الخ. والنهاية كل يصلح سيارته. في لندن سواء استاد ويمبلي أو ارسنال او سبيرز اي خطأ يحدث من أحد والله يا تشوف السكوتلنديارد ساحبين ربيعنا وبدل ما يحتفلون في اجور رود يقضون كم ليلة في المخفر! مرة ثانية العقل زين، تخلص المباراة ويالله احتفالات في العريجا والتحلية وتخب علينا بعد!