رد الفنان سعد الصغير على الدكتور مدحت العدل، بعد أن ذكر الكاتب اسمه في تغريدة أثارت غضب رواد موقع التواصل الاجتماعي «تويتر» أمس الأول. وقال «الصغير»، في مقطع فيديو بثه عبر حسابه بموقع «انستجرام» إن من قال هذه الكلمات بحقه هو «دكتور سيناريست»، مردفًا: «هو اللي بيكتب لنا الأفلام، لكن لو حد تاني غلبان زي أبويا الله يرحمه نقول راجل مش فاهم». وأكمل «الصغير»: «لكن حضرتك فاهم، دكتور مدحت بيدرسلنا كفنانين، بيقول لي بص يا سعد، عاوز تغني بحبك يا حمار عايز تغني الكلب أو الأسد غنيها جوا فيلم، لو غنتها برا هتتحبس، دكتور مدحت بيقول لنا كده». وتابع «الصغير» رده: «حضرتك عارف إن بحبك يا حمار دي في سياق فيلم.. إنت بتعلمنا كده، شادية غنت للحمار وشكوكو، إنت كده بتعمل تنمر». وكان الكاتب والسيناريست مدحت العدل دوّن تغريدة، سببت حالة من الغضب تجاهه، إلى حد تدشين هاشتاج « #مدحت_العدل_متنمر »، وجاء مضمونها كالآتي: «الجمهور اللي منه نجيب محفوظ، وأحمد زويل، ومجدي يعقوب، ومثقفي وفناني مصر، مش هيعرفوا فاوست.. وصاحب أغنية (بأحبك ياحمار) سعد الصغير مشجع أحد الأندية العربية هيعرفه.. يا أمة ضحكت من جهلها الأمم». ورد «العدل» على الهجوم أمس في تصريحات لـ«المصري لايت»، متسائلًا: «فين التنمر اللي اتنمرته.. هل أنا قولت (عن سعد الصغير) إنه قصير أو طويل؟ فين التنمر؟ هناك شخص تنمر على جمهور الزمالك فأنا رديت عليه». وقدم الفنان الزملكاوي اعتذاره لـ«الصغير» بقوله: «أنا بعتذر له لو هي زعلته، أنا راجل كبير ولو حد زعل بعتذر له.. هو ابن شبرا وحبيبي وصاحبي وبحبه، بس أكيد ما يعرفش فاوست». الجمهور اللي منه نجيب محفوظ وأحمد زويل ومجدي يعقوب ومثقفي وفناني مصر مش حيعرفوا فاوست وصاحب أغنية ( بأحبك ياحمار) سعد الصغير مشجع أحد الأندية العربية حيعرفه .. يا أمة ضحكت من جهلها الأمم — MedhatELAdl (@ELAdlMedhat) August 27, 2020