شارك المخرج خالد جلال جمهوره ومتابعيه ذكرياته مع حرب أكتوبر عام 1973 عبر حسابة الرسمي بموقع التواصل الاجتماعي فيس بوك، وكيف كان يوم 6 أكتوبر هو يوم خاص في بيت كل مواطن مصري، عاصر تلك الفترة، حيث كتب قائلا:"٦ أكتوبر ١٩٧٣ فاكر وانا صغير المذيع حلمي البلك ف التلفزيون الأبيض واسود ابو قناتين بس وهو بيعلن العبور والنصر وكل ستات العمارة بتزغرد ف نفس اللحظة فاكر وانا صغير رايح مع ابويا وامي واخواتي ماشيين على كوبري قصر النيل رايحين أرض المعارض ( الاوبرا حاليا ) نزور معرض الغنايم وسامعين هدير الناس بتغني ورا محمد نوح العظيم واللي واقف طول اليوم بفرقته يغني مدد مدد الناس ترد تقول شدي حيلك يا بلد.وأضاف: تخش ارض المعارض تلاقي الابطال جنود مصر واقفين جنب بقايا دبابات وطيارات العدو تتصور بنفسك جنب دليل هزيمتهم على ارض مصر وتشتري ميدالية طيارة فانتوم أو قميص عليه صورة ابطال مصر وانور السادات بطل الحرب والسلام فاكر عاش اللي قال للرجال عدوا القنال ورايحين ف ايدنا سلاح وراجعين شايلين رايات النصر فاكر اول رحلة مع المدرسة لسيناء بعد الحرب وراجعين كل واحد معاه طلقة مدفع فاضية يحولها كل بيت ف مصر لزهرية ورود تفكره بالنصر فاكر اول حفلة كورال لمدرستي ليسيه الحرية على مسرح ايوارت ف الجامعة الأمريكية واحنا بنغني باسمك يا بلدي جيشك وشعبك يردوا التحدي.. فاكر أهلي الكبار وهما بيتبرعوا بالدم للجرحي والمصابين فاكر جيراني واولادهم راجعين من الحرب مصابين وسلام ومنهم اللي مارجعش واتكتب شهيد فاكر اول مرة دخلت السينما اشوف الرصاصة لا تزال في جيبي والوفاء العظيم وحتي اخر العمر والعمر لحظة وبدور ونجوم مصر بيوهبوها فنهم غنا وافلام فاكر وفاكر وصاحي على يوم عظيم لازم تفضل فاكره وتفكره لكل الناس وتعلمه لولادك وبناتك وتفكر الكل... الكل... ان مصر ما بتنهزمش طول عمرها وانها دايما منتصرة....و تاخد منه اعظم طاقة لاعظم بلد ف الكون...... تحيا مصر.... تحيا مصر..... تحيا مصر".