التعلق شعور مدمر لأقصي درجة، أمر مرهق للنفس وبيخليك تحس انك مش كويس وان فيه شيء بيسحب طاقتك وبيجذبك في النهايه للمجهول ويكون سبب في تدميرك نفسيا وجسديا ، ودا بيخليك تحس ان تعلقك العاطفي شماعة للحزن والاسى والفشل في علاقتك او حياتك عموما ..لأن التعلق اساسه هو اشباع خلل بداخلك ، ولما بتقابل شخص معين بيسد عندك الخلل ده فـ بتتعلق وبتتمسك بيه وبتخاف انه يروح منك او يبعد عنك ..حالتك بتكون زى اللي بيشرب من ميه مالحة كل ما تشرب منها كل ما بتحس بالعطش اكتر .. بمعني انك مش بتشوف الحياه ولا بتحس بالسعادة بدون الشخص ده وعقلك يوهمك ان ده حب ، وبتبدأ تدخل في دايرة المعاناه والتدمير الذاتي لنفسك ،لا تقدر تاكل ولا تشرب ولا تنام في غياب الشخص ده، اذا حضر تهتم بنفسك جدا واذا غاب بتهمل نفسك وتبقي حزين وسرحان ومش قادر تستمتع بأي شيء..تعلقك العاطفي الشديد لشخص ما بيدخلك في حقل طاقته ودا بيضرك جدا لانك بتكون تحت رحمته زى الاسير وبيخلق عندك عدم الانتظام في حياتك عموما ، بيخليك رابط سعادتك بشخص واحد كأنك عايش ليه هو وبس وموقف حياتك بكل امورها وتفاصيلها عليه وعلشانه ..اذا كانت دى حالتك للاسف انت كدة بتعيش حالة تعلق مرضي ودا كفيل يدمر ذاتك ويهد ثقتك في نفسك تماما..الحل هو انك تحب الاخرين لكن بدون التعلق الشديد بيهم ، ووازن دايما ما بين قلبك وعقلك .. تعامل مع الاشخاص بشكل يخليك تقدر اذا غابوا او بعدوا عنك تكون قادر انك تستغني عن وجودهم.. مش بستغرب ابدا لو لقيت حد تعب نفسيا بسبب الفراق، فيه ناس فعلا لما بتحب بتحب بكل حاجة ولما بتتساب بيتاخد منها كل حاجة.. وفيه غياب كفيل يدمر حياتك وفيه غياب كفيل يحولك ١٨٠ درجة..لكن خلينا نتفق ان الفراق مش بيموت ،بس بيتعب ، بيتعب فترة وبس ،مهما طولت هي فترة وهتعدى وبعدها قلبك هيجمد وهتتعود تعيش حياتك وانت مش خايف ولا قلقان من فراق أي شخص مهما كانت غلاوته عندك ...علشان كدة اياك والتعلق المرضي بشخص معين، لأن كل ما هترتبط بيه اكتر هيتلاعب بمشاعرك اكتر لانه ضامن وجودك وتعلقك بيه وهيكون سبب في انك تلغي شخصيتك وتبقي مقيد بشخصية الاخر ، ويسحب طاقتك وتبقي في دايرة مفرغة من خسران الطاقه باستمرار وتفضل في حالة استنزاف لطاقتك وهدرها وفوق كل ده بتجذب لنفسك كل شيء سلبي من الطرف الاخر بسبب تعلقك الزايد بيه ..روحك ونفسك امانة وحقها عليك انك تحبها وتقدرها ويكون اساسنا اعلاء قيمه ذاتنا مش مجرد اشخاص بنستمد قيمتنا من وجود الاخرين في حياتنا  ...وانتهي كما ابتديت ..التعلق ليس هو الحب ..التعلق لعنة نهايتها كسر القلب والروح .. لكن الحب باختصار هو ان تختلف وتتفق وانت آمن من الالم والفراق ..