نعى المخرج يسرى نصر الله رحيل السيناريست وحيد حامد عبر منشور على صفحته الشخصية على موقع التواصل الاجتماعي "فيسبوك" واصفا وقع خبر رحيل "حامد" عليه بفقدانه لحالة الاتزان، كما أشار أن الراحل كان يستطيع ببراعة تجسيد آلام الناس في أعماله التي يكتبها، دون الخوف من أي قمع.فكتب "نصر الله" في منشوره قائلا: "مافيش كلام يقدر يعبر عن إحساسي بخسارة وحيد حامد.. حزن؟ أكيد.. بس هي حاجة بتتجاوز الإحساس بالحزن.. زي فقدان بوصلة أو فقدان توازن.. واحد كان بيديني إحساس بالقوة لما يكتب فيلم أو مسلسل ويتعمل وألاقي فيه كل إللي بيوجعني ويوجع ناس كتيرة.. وألاقي الموهبة المهولة إللي بيحكي بيها الحاجات دي ويبقى مبهج، وذكي، ولامع، ودمه خفيف. حاسس بالدنيا وحاسس بالناس.. واحد وفي لأصدقائه، ووفي لكل الناس إللي حبت أعماله ومواقفه.. واحد دخل في وجدان الناس بموهبته وفنه.. وغصب عن أي حد كان وحيد بيلاقي الطريقة إللي شغله وفنه يشوف النور.. فنه وموهبته وكرمه عملوله أصحاب كتار جدا.. وعملوله أعداء طبعا، كان بيعرف يسحقهم أو على الأقل يحيدهم بفروسيته.. وحيد يمكن آخر واحد من الفنانين والمثقفين الكبار إللي موهبتهم وإحساسهم بالناس كانت أقوى من أي قمع.. نوع من الفنانين إللي عاش زمن فيه الموهبة والفروسية يتعمل لهم ألف حساب.. زمن كان لسة بيشوف وبيسمع.. مع السلامة ومعاك كل الحب يا وحيد.. يا أستاذ وحيد حامد".