يحرص الفنان تامر حسني على مخاطبة جمهوره من آن إلى آخر، وذلك عبر صفحته الرسمية على موقع «فيس بوك». وأرد تامر حسني، أن يشارك جمهوره ومحبيه، تفريغ طاقتهم من خلال عدد من الأسئلة المرتبطة بما ما يتعرضون له من مضايقات في نفسهم ومجتمعهم وعالمهم. وقال تامر حسني عبر صفحته الرسمية على موقع «فيسبوك»، رداً على عدد من الأسئلة التي شاركها مع جمهوره مسبقاً: «من امبارح وأنا بحاول أقرأ كل تعليقاتكم، وطبعاً تأثرت جداً ولقيتني غوصت جوه ماسورة طاقة سلبية رهيبة، بس التحدي إني استوعبها كلها وأخرجها لكم إيجابية». وأضاف: «أقسم بالله قاعد أقرأ تعليقاتكم من امبارح متحركتش من مكاني، قسّمت الردود على كل المواضيع، وبرضو بقول إن ردودي نابعة من أخ ليكم وإنسان عاش تجربة كبيرة من الظلم والنجاح، وشوفت فيها كل اللي هشرحه في البوست». وتابع: «نوعية أسئلة الدنيا رايحة بينا على فين، والكورونا والحروب والقدريات كلها اللي احنا كبشر ملناش ذنب فيها دي في ايد ربنا مش في ايدينا غير الدعاء والتفائل بالخير، بس أنا هتكلم أكتر في اللي في ايدنا».Log into Facebook Log into Facebook to start sharing and connecting with your friends, family, and people you know. واستطرد: «على قد ما قرأت وجمعت آراء من خلال الآراء المتشابهة اللي معظمها اتكلم عن الوساطة والمحسوبية والفشل والإحباط وضعف الثقة بالنفس والعنصرية تناقض المجتمع وعدم الأمان في الدنيا وعدم فرص العمل، هحاول أرد على حد علمي وخبرتي المتواضعة في الحياة، لعل شخص واحد يقتدي برأي، مش هتكلم على اختلاف عادات المجتمعات لإنه موضوع نسبي، ويتعلق ببلدك وتربيتك وعاداتك وأسرتك، لازمه شرح كبير وأسئلة كتير نسبية رايحة جاية». وأشار: «نيجي لموضوع الواسطة والمحسوبية وكل ما ذكرته في أول الكلام هو فعلاً موجود بشدة وبقسوة، وأنا شخصياً مريت بيه وقهرته وأنا طفل وشاب فقير اتعرضت لكل ما ذُكز، يا جماعه بما إنك عايش في مجتمع فيه كدا يبقى مش قدامك غير التميز الواضح عشان كفاءتك تحرج اي مسؤل أو مدير، يعني لو إنت دلوقتي شخص ذو كفاءه عالية لازم تشتغل على نفسك تاني، وتبقى ذو كفاءه عالية جداً جداً و متميز كمان، والأهم يكون عندك ثقة كبيرة في ربنا ملهاش حدود، عشان هو شايفك وأكيد هيكافئك على مجهودك، بس إنت اتعب واعرف انك تتعامل مع ظروف مجتمعك الحالي». واستكمل حديثه: «هو عصر صعب بس ينفع تنتصر عليه اما فكرة الفقر والظروف الصعبة عايزك تفهم إنك مش لوحدك خالص معظم الناس كدا وفيهم مستسلمش لظروفه ومرضه وقرر يقهر الظروف دي، افتكر دي دايماً ان في واحد اسمه ” لولا دا سيلفا”، كان فقير وخرج من المدرسة وصباعه اتقطع واشتغل ماسح أحذية وتعب وكافح واجتهد وصبر وفكر يتميز لحد ما وصل بقى رئيس جمهورية البرازيل». وأضاف: «نيجي للصفات المجتمعية اللي مزعلانة كلنا، وتغير قلوب الناس والشتائم الجارحة في التعليقات، يعني تلاقي بعض الناس مباركين أوي لعلاقة شخص مصاحب واحدة، وبيتريقوا على شخص اتجوز واحدة، واحد محترم المجتمع والاعلام متجاهلينه وشخص مهزق عاملين له سعر». وقال: «الدنيا بقت فجأة ماشيه بالعكس، تلاقي إنسان حثالة وسفيه بقى مشهور فجأة، ومعاه فلوس، وجهات مسؤله بتهتم بيه وتكتب عنه، لأنهم شايفين إنه ليه موردين فا بيتاجروا بيهم وبعددهم و سايبين توعية وانقاذ فكر المجتمع وشبابه الصاعد، طبعاً دا شيء سلبي وأحد سمات عصرنا». وأكد: «محتاجين نفهم أن السيرة الطيبة هي الأهم واللي بتدوم، يعني مش كل مشهور فهو صاحب سيرة طيبة، ما احنا ممكن نسمع عن حرامي مشهور أو سفاح مشهور هل دا معناه اننا نقتدي بيه اكيد لأ، خلوا اللي يلفت نظركم اللي سيرته كويسه ميغركوش الشهرة مع شخص فاسد، السيرة الطيبة أهم وأرقى من الشهرة في المطلق، زي ما العطور لها رائحة نفاذة القمامة ايضاً لها رائحة نفاذة، المهم انطباعك الطيب، الدنيا كلها كدا والشر نَفسه موجود وصوته عالي، كل اللي علينا اننا نتجاهل أي شخص يصدر فساد وتخلف ونركز مع الناس اللي ممكن تفيدنا». وأضاف: «نيجي لبعض الصفات الشخصية اللي تزعجنا زي التسرع وتضييع الوقت و الطيبة الزائدة والشخصية المترددة والشخص اللي كل شويه يحاول ويفشل واللي بياخد كل حاجه على اعصابه، كل الحجات دي عايزة تمارين حقيقي مع النفس أولاً ، هطمن كل اللي كاتب عيوبه، هو لمجرد إنك عارف عيبك ومعترف بيه دي أول خطوة إيجابية لعلاجك، لازم إنت تقوّم نفسك انت تبقى مُعلّم نفسك، هو دا الصراع الدنيوي الحقيقي، انك تقاوم نفسك و تطور منها ، بص لعيبك حالاً وكلمة قوله أقسم بالله هتخلص منك قول، هبطل مخدرات، هبطل سجاير، هبطل خمرة، هخس، هتخن، هتمرن، هواظب على الصلاة، مش هبص لحياة غيري، هبطل اللي مضايقني من نفسي اياً كان». وتابع: «ابدأ في التمرين كل ما تجيلك فكرة سلبية في دماغك حط مكانها عكسها حط الإيجابي، كل ما تجيلك فكرة محبطة إنك مش هتقدر قول لأ أنا هشوف الفكرة مليانة أمل وشايف نفسي قادر، أرجوكم كلكم لازم لازم لازم كل حد فيكم يشوف نفسه في خياله شخص ناجح، ومحقق اللي نفسه فيه، هتقدر تبني في خيالك طاقة جذب لشيء جميل فا مخك هيعمل كل جهده إنه يفكر أحسن ويوصل للهدف الجديد اللي انت زرعته قدامه». وأضاف: «تنبيه! والعكس صحيح، أرجوكم قبل ما تناموا افتكروا حجات حلوه تفرحكم دي آخر حاجه تسيبوها في مخكم قبل ما تناموا عشان هتصحوا عليها، فا لو وحشه هتصحوا متنكدين، لو حلوه هتصحوا فرحانين ويومكم أجمل». أما عن تحديات المرض قال تامر حسني: «صبرك عليه والتعايش بصدر رحب مصاحب بإيمان حقيقي لكلمة الحمد لله، ليه أجر أعظم من أي حاجة، وخلي الأمل دايماً موجود ولو حتى الدكاترة أكدولك إن مفيش امل في الشفاء، إعرف إن ربنا قادر على كل شيء، ولو يا سيدي ربنا أراد بقاء المرض معاك فا إعرف إنه اختار لك أصعب امتحان عشان شايلك أكبر أجر بس قول من قلبك الحمد لله بإيمان تام مش كلام بس». وأختتم حديثه: «وابدأ في رحله جديدة في التعايش مع مرضك، وقول هنجح برضه لأن في نماذج كتير في الدنيا زيك وأكتر ووصلوا لقمم النجاح، متبصش تحت رجليك، متبصيش تحت رجليكي، الفوز العظيم مش في الدنيا والله، الدنيا دي محطه بتأسس وبتبني فيها حياتك الأبدية». وكان تامر حسني، شارك جمهوره عدد من الأسئلة عبر صفحته الرسمية على موقع «فيسبوك»، وقال: «يا صباح الخير والرزق على كل الناس من باب الدردشة وتفريغ الطاقات الفكرية، عايز كل حد فيكم يعبر عن نفسه ويكتب هنا أكتر حاجة مضايقاه في نفسه، أكتر حاجة مضايقاه في مجتمعه، أكتر حاجة مضايقاه في العالم». ◙|شاهد| تامر حسني يفتح الباب لـ«تفريغ الطاقات الفكرية»: «توكلنا على الله» وأضاف: «طبعًا بمصطلحات ينفع نقراها كلنا، وهحاول أقرأ المعظم وعلى قد مقدرتي وخبرتي هحاول أرد، توكلنا على الله». وتفاعل معه عدد كبير من جمهوره ومتابعيه من رواد مواقع التواصل الاجتماعي. يُذكر أن تامر حسني شارك مؤخرًا بأغنية «ارفع إيدك» التي أطلقتها اللجنة المنظمة لبطولة العالم لكرة اليد، وهي الأغنية الرسمية لنسخة مصر 2021، وتخطت حتى الآن حاجز الـ3 مليون مشاهدة منذ طرحها على قناة «يوتيوب». وشارك تامر حسني معه في العمل، مطرب الراب مروان موسى ومطربة صاعدة من اكتشافه وهي هدى الشربيني لأداء الجزء الخاص باللغة الإنجليزية. وتم تصوير الأغنية على طريقة الفيديو كليب وسط أشهر معالم مصر بين القاهرة، وأسوان، والجلالة، العين السخنة.
مشاركة :