نشرت الفنانة منى هلا، صورة للراحلة نوال السعداوي، عبر حسابها الشخصي على موقع الصور والفيديو انستجرام، وعلقت عليها وكتبت: «إن حريتي لا أستمدها من خلايا ضعيفة من خلايا جسدي، وإن قيودي لا تنبع من خوف على عذرية واهية تمزقها خبطة عشواء وتوصلها غرز العلم، قيودي أضعها بنفسي حين أريد القيود، وحريتي أمارسها بإرادتي كما أفهم الحرية،.. نوال السعداوي«. وأضافت «منى»: «جالى كمية كومنتات قذرة وشماتة وشتيمة مش طبيعين والغريبة ان اكترهم ستات، اللى بيقولوا هلكت ؟، يا جماعة انتو عبط ؟، الست ماتت فوق التسعين سنة وما شاء الله قمة في التركيز والنباهه والذكاء ويا ريت تتفرجوا على اللقاء الأخير ليها، والله يا ريت الواحد يموت كده وهو لسه مركز وواعى باللى بيعمله وبيقوله». وتابعت: «اللى بيقولوا يا رب تتحشرى معاها في جهنم، هو انتو جايبين النتيجة من الكنترول خلاص، ونصبتوا نفسكم اله، ومقتنعين تمامًا مين اللي رايح جهنم ومين رايح الجنة ؟، وعمومًا يا سيدى أنا يشرفني اتحشر مع ست فاضلة شجاعة ومناضلة العالم كله كرمها واحترمها، مالكش دعوة أنت بس». وأكدت «هلا»:«أنا متأكدة أن اللى بيعمل كده لا قرا ولا شاف ولا عارف خالص الست دى كانت بتتكلم في إيه وبتفكر ازاى، فبدل الهبد بمؤاخراتكم على الكى بورد ونشر أفكاركم المتطرفة اللى بتردد أي كلام وخلاص أنصحكم بقراءة كتب دكتورة نوال أو حتى أتفرجوا على اللقاءات بتاعتها وشوفوا بتتكلم في ايه بدل ترديد كلام متخلف، رحم الله الدكتورة نوال وحتى لو رحلت بالجسد فهى موجودة بأفكار وعلم لن يفنى أبدا».