سؤال يفرض نفسه في بداية كل موسم، النوادي الصغيره اللي على قد حالها يوم تلعب في دوري المحترفين شو يكون طموحها؟ أكيد كل همها مركز من المراكز اللي في ذيل الجدول يعني أهم شي عندها، أنهم ما ينزلون، ولا يقصون على أعمارهم ويوهمون جماهيرهم بمواعيد عرقوب، ويحلمون بغير هالشي، خلونا واقعيين لأن المنافسة تبغي لها نفس طويل ولاعبين صح وبديل (هبريح)، يعني فريق ثاني في الدكة، وانتوا راس مالكم، كم من لاعب طافوا الثلاثين يبتوهم بضرابه من بعض الأنديه. } لكن السؤال اللي محيرني ومحير جماهيركم يوم انتوا هذي امالكم، عيال النادي شو يسوون يفرمون بصل، وفرق الناشئين والشباب والرديف وايش حقه يدربون وتخسرون عليهم هالمخاسير عشان عقب كل هذا تفجون بروسهم ونشوفهم يلعبون في الفرجان والدورات الرمضانية أو يتحولون لكرة الصالات والا يخطفونهم منكم الأندية الكبيرة ويا ليت تستفيدون من بيعهم، تدرون ليش ما تستفيدون منهم؟ لأنه عقودهم منتهية، والا بلا عقود وعشان شذي، ينتقلون بمزاجهم، وهم طبعاً يسمعون عن ربعهم في النوادي وعن الهمجه، اللي يأخذونها والسيارات والهدايا، وهم فاجين حلوجهم، ويطالعون وعادي اذا حصلوا فجه، وعقودهم منتهيه بيطرون السكه، لا تقولون عيال النادي انتوا في البادي اهملتوهم وبعدين هاليومين بدرهمك المنقوش لا بالعزايمي. } وبعدين يوم انتوا سنة فوق وسنة تحت، اعيال النادي ابدى من الغير، وأحسن من اللعيبه اللي تيبونهم من الأندية وتدفعون لهم هالمبالغ العوده، وهم اصلاٍ منتهين، ركزوا على عيال النادي مع بعض الأجانب الصح، يعني هب لازم ادورون عن أجانب مشهورين، والا العبوا في الدوريات الأوروبية، لأنه حتى هاذيل الأجانب ما طاعوا يوافقون على هالعقود الرخيصة إلا من عقب ما انتهوا. أنا احيد من مدة نادي من النوادي الصغيرة كنت قريب منهم يوم كانوا يدورون لعيبه، تبغون الصدق انصدمت من الميزانية والرواتب اللي كانوا يعرضونها على اللعيبة المواطنين احيد انه أقل لاعب راتبه 70 ألفاً وأعلى راتب 150 ألفاً في الشهر من غير المكافآت يعني ميزانيتهم ما تفرق عن الفرق الكبيرة بس المصيبة في (النقوه) والاختيار يعني لا تتعلثون بالفلوس، قبل الاحتراف كانت فرقنا يجيبون لعيبه ما قد سمعنا عنهم وتوهم ظاهرين وصغار في العمر هب شرا الشواب اللي عندنا اليوم، وطاري الأولين لليوم باقي لأنهم قدموا الكثير لكورة الإمارات، ودروا عنكم الفيديوهات والسماسره واخذوا لكم لفه على إفريقيا، وبتحصلون اللي يرضيكم مع كم لاعب من عيال النادي يكون عنده وفا وغيره على الفانيله والشعار، لأنه اللي ياي من برع، عقده بينتهي وبيشوف له نادي ثاني، وهب فارقه معاه والمهم راتبه يمشي، والنادي يحترق وفي النهاية المثل يقول لو فيه خير ما عافه الطير وسلامتكم. بروه الوقت هذا وقت الجيوب العامره دايم بالأحلام والا المحبه وطيب القلوب بالوقت هذا كلها أفلام