كشف أدمن الصفحة الرسمية لـلإعلامية المصرية أسماء مصطفى عن تطورات حالتها الصحية بعد نقلها إلى المستشفى إثر تعرضها لأزمة صحية مفاجئة جراء معاناتها مع مرض السرطان، مؤكدا إنها في وضع حرج، وحالتها غير مستقرة، ونفى ما تردد عن دخولها غرفة العناية المركزة. وكتبت الصفحة الرسمية للإعلامية أسماء مصطفى على الفيس بوك: أسماء لا تزال فى المستشفى فى وضع حرج وحالة غير مستقرة فضلا الدعاء. وبعد انتشار شائعات طوال ليل أمس عن دخول أسماء غرفة العناية المركز، تدخل أدمن صفحتها مجددا لنفي الشائعة قائلا: أسماء داخل المستشفى ب غرفه عاديه ليست بالرعايه المركزة كما ذكر البعض وًتقبل الله دعواتكم جميعا متمنين لها السلامة. يذكر أن أسماء أعلنت منذ أيام قليلة تعافيها "جزئيا" من الأورام السرطانية، وبدأت تنفيذ وعدها بمشاركة متابعيها بعض خبراتها كمريضة للسرطان، بتوجيه رسالة حب إلى زوجها الدكتور أيمن أبو العلا، مؤكدة أنه لا يزال يراها أجمل سيدة في الكون رغم أن المرض الملعون "دمرها" حسب وصفها، وتوقفت أمام أهمية الدعم النفسي لمريضة السرطان. ونشرت أسماء مصطفى صورة لها مع زوجها، عبر حسابها الشخصي بـموقع الفيس بوك، وعلقت عليها قائلة: امى ربنا يديها العمر والصحة ويصبرها على ابتلاءها فيه قبل ما اتجوز لانى كنت برفض ناس كتير كل ما كانت تسألني كنت اقولها عايزة اتجوز راجل بيحبنى بجد لنفسى كانت تدعى وتقولى ربنا يرزقك بالى يقدرك ويريح قلبك يكون ابن اصول عمرها ما اتمنت ليه عريس يجبيلى مثلا شبكة بكام ولا هسكن ولا حاجة خالص زى ما بيحصل ولا طلبت غير راحة بالى وحد يقدرنى. وتابعت: وربنا سبحانه وتعالى استجاب دعوتنا احنا الاثنين رزقنى براجل بجد بيحبنى لنفسى ولشخصى وبيقدرنى والمحنة والمرض خلونى افتكر دعوتها. واختتمت قائلة: المرض الملعون ده دمرنى لكن هو شايفنى أحلى ست فى الدنيا ولاقيته ضهرى وسندى فى دنيتى، ربنا يحميه ويحفظه ويكفيه شر الحاسدين ويبارك فى اولادنا ويحفظهم ونقدر نعدى المحنة ونخرج بمنحة يا رب صبرنا على ابتلاءنا. وسبق أن كشفت أسماء مصطفى، أسباب عدم مشاركة تجربتها في مقاومة مرض السرطان مع متابعيها مثل بقية المشاهير، مؤكدة أن حالتها الصحية "معقدة"، ولا زال الفريق الطبي يحاول الوصول لبروتكول علاج كيماوي يناسب حالتها المتأخرة نسبيا، واعتذرت عن تقديم بث مباشر لطمأنة محبيها مؤكدة أنها لن تظهر وهي بهذه الحالة الصحية. ووجهت أسماء رسالة لكل متابعيها عبر صفحتها بموقع الفيس بوك قالت فيها: مساء الخيرات عليكم وتحياتي وشكري لكل الناس الجميلة على الصفحة، ردا على سؤال باتسأله كتير جدا هو أنا ليه مش بحكي تجربتي وتفاصيل المعركة مع المرض اللعين مع إن في ناس كتير عملت كده وإن ده مهم علشان غيري يستفيد؟ الإجابة ببساطة إني طبعا مقتنعة ومدركة بأهمية إن مريض السرطان بيقدر يفيد غيره بتجربته وبيكون فعلا فيها أمور كثيرة وأحيانا معقدة جدا. وأضافت: بس أنا ما زالت في هذه المحنة وحتى الآن واللحظة ماعنديش جديد غير إني منتظرة إني مع الفحص الجاي بإذن الله ألاقي استجابة للعلاج، وأكيد بإذن الله لما ربنا يكتبلي الشفاء من عنده هطلع وأقول واتكلم معاكم كتير، نفسي أكون مفيدة فعلا للناس بس حاليا مينفعش. وتابعت: الحاجة الثانية زي ما وضحت قبل كده ده مرض ملهوش كتالوج في ناس نفس حالتي وكانت ظروفهم أفضل مني وفي العكس طبعا الشيء الأهم اللي هانصح بيه وبكرره مفيش حالة زي الثانية حتى لو كانت نفس الإصابة، لأن جسمنا مش واحد ولا هنعاني نفس الأعراض لا أنواع السرطان واحدة ولا العلاجات واحدة ولا الأجسام واحدة، علشان كده بلاش تبادل خبرات الأدوية لأن دي يحددها الطبيب المختص فقط حسب كل شخص. واختتمت حديثها، قائلة: وفي حالات معقدة زي حالاتي بتاخد أكثر من نوع علاج كيماوي مع بعض، وكل شوية تعديل. رجاء نخلي بالنا نتوكل على الله وناخد بالأسباب وربنا كريم، وإن شاء الله أقابلكم على خير وبعتذر على اللايف في الظروف الحالية صعب لأني عاوزاكم تشوفوني كويسة وده نقطة تانية أكيد هنتكلم بردوا عنها وهي نظرة الآخرين لمريض السرطان بعد ما المرض والكيمو يفترسوه وربنا يهونها من عنده. وسبق أن حذرت أسماء من تجاهل البعض لأعراض المرض مؤكدة أنها فوجئت بانتشار السرطان في معدتها، وقالت: انا بكتب الكلام ده علشان عارفة ان فى ناس كتير بحبهم واتمنى نصيحتي توصل للكل، بالمناسبة انا كنت مبشتكيش كتير كنت طول الوقت باجى على نفسى ابتلاءات فى حياتى خلتنى اخر حاجة افكر فيها ادخل مستشفى او اعمل أى فحص كنت بتعامل مع المسكنات زى البنبون والمسليات اتعب اخد مسكن واكمل مكنتش احب احسس اللى حواليه بتعبى واخدها طول وعرض لحد ما اكتشفت ان السرطان بياكل فى معدتى. وأضافت: وحتى بعدها كنت بدور على علاج ميخليش اعراض تظهر عليه علشان اخبى على عيلتى واكمل شغلى وموجعش قلب حد لحد ما المرض غلبنى. وقالت: نصيحة لوجه الله لما تتعبوا قولوا روحوا اكشفوا واطمنوا على نفسكم بلاش العادة السيئة اى دوا من الصيدلية ومسكنات ونكمل ارجوكم بلاش. لمشاهدة أجمل صور المشاهير زوروا «انستغرام سيدتي» ويمكنكم متابعة آخر أخبار النجوم عبر تويتر «سيدتي فن»