حرص الفنان عمر السعيد نعي الفنان الراحل محمود اللوزي الذي توفى صباح اليوم الإثنين، وذلك من خلال حسابه الرسمي على موقع تبادل الصور والفيديوهات "إنستجرام".   حيث نشر عمر السعيد صورة له، وعلق عليها قائلًا: "يوم حزين على كل حبايبك يا محمود.. أفتقد اليوم أستاذي ومعلمي الكبير وأفضل مخرج مسرحي ومدرب تمثيل في مصر.. فاكر ضحكتك الحلوة وهزارك، وفاكر لما كنت بعصبك وتقعد تطير في الكتب مني ومن اللي بعمله.. طب فاكر يوم ما قولتلك أنا كل مسرحية بعمل اختبار ومبتاخدنيش.. تقولي عادي مفيش دور ليك وبلاش دوشة".    وحكى عن كواليس الأعمال المسرحية التي جمعتهما، مُضيفًا:" فاكر يوم ما عملنا مسرحية إيزيس حبيبتي وكانت الناس بتضحك ويصفقوا على مشاهد ليا، وده لو تعلمون أمر ممنوع، وعظيم في مسرح الجامعة الأمريكية، وبعد العرض تقولي بطل شغل التجاري ده وبكرا ما تقولش حرف زيادة عن النص.. طب فاكر لما كلمتك وجيتلك البيت وقولتلك فيه مخرجة اسمها كاملة أبو ذكري، اللي عاملة فيلم ملك وكتابة وكان خطير وقتها، وعاملالي اختبار بكرا وعايزك تمرني على اختبار التمثيل لفيلم اسمه واحد صفر".    وأضاف:" محمود يا حبيبي جمايلك وطيبة قلبك وذكرياتنا سوا عمرها ما هتتنسي.. ذكرياتنا كتيرة وحلوة سوا يا حبيب القلب.. أنت شكلت وجداني وأفكاري ومش أنا بس لا.. ده جيل كامل من تلامذتك.. هتوحشنا أه بس أنت موجود جوا كل واحد فينا.. بحبك يا لوزي.. وخالص عزائي لسوسن وأحمد ويسرا".