كشفت الفنانة إيناس مكي، أسباب استبعادها من فيلم "مواطن ومخبر وحرامي"، بطولة خالد أبو النجا، وشعبن عبد الرحيم.   وقالت إيناس مكي، خلال لقائها مع الإعلامية ياسمين عز في برنامج "كلام الناس" على قناة MBC مصر، إنها استبعدت من المشاركة في فيلم "مواطن ومخبر وحرامي" لأنها رفضت تجسيد بعض المشاهد الحميمية التي احتوى الفيلم عليها.   وأضافت: "الفيلم كان ليه بطلتين واحدة متحررة بتاعة كتب وبتتكلم عن حرية المرأة ودي الشخصية اللي اتعرضت عليا، والبطلة التانية من الطبقة الشعبية، واللي اشتغلت معايا البروفات كانت حنان ترك مش هند صبري".   وتابعت: "اشتغلت شهرين بروفات والدور لو كنت عملته كان هيبقى نقلة رهيبة ليا، وكان 35 مشهد، لكن كان منهم 7 مشاهد فيهم تفاصيل أنا لو قلت تمام هصورهم، والـ 7 مشاهد كان فيهم مشاهد إنها هتبقى بقميص النوم وهتقلعه وهتبقى بالملابس الداخلية وأنا مش هعرف أصور ده، وفيه مشاهد تانية حميمية، ومشاهد مع شعبان عبدالرحيم".   واختتمت إيناس مكي: "المخرج داوود عبدالسيد، سألني يعني حضرتك معترضة على إيه بالظبط؟ قلتله أنا مش ممثلة متخلفة ومؤمنة بدوري في توصيل المشهد، لكن التفاصيل دي أنا مش هقدر أقدمها والمعنى نفسه هوصله، فرد وقاللي هنبقى نشوف الكلام ده، وبعدها استبعدت".