علقت الفنانة إلهام شاهين، على إعلان اعتزال الفنانة آثار الحكيم، الفن وتفرغها للعبادة، وهاجمتها بسبب ذلك.   وقالت إلهام شاهين، خلال لقاء ببرنامج "حبر سري"، المذاع على شاشة قناة "القاهرة والناس"، وتقدمه الإعلامية أسما إبراهيم: "اللي عاوز ينسحب ينسحب في هدوء ودون إعلان، مش لازم يعلن، وفيه فنانين كتير عملوا كده، مقالوش هنعتزل، هي اختفت فخلاص لما تتعرض عليها أعمال مش بتوافق وبالتالي اتعرف أنها مش عاوزة تشتغل في هدوء واحترام للفن ودون من غير ما نتكلم، الفن صح ولا غلط ولا حلال ولا حرام، دول اللي مش بحب أسمعه منهم".   وأضافت: "هي معتزلة من أكثر من 20 سنة، ومشفتش لها عمل من مدة طويلة، وبعدين إزاي تفرغها للعبادة طب والسنين اللي فاتت كانت متفرغة برضه وعندها وقت تصلي وتصوم وتعمل اللي هي عاوزاه، كلام ملوش معنى".   وتابعت: "لو أنت مش محترم المهنة دي دخلته ليه؟ متدخلهاش من الأساس، وأثار الحكيم، متفرغة من زمان ومكنتش بتشتغل، وإعلانها الاعتزال ملهوش معنى، اللي عاوز يبعد يبعد في هدوء وخلاص".   وانتقدت إلهام شاهين، حديث آثار الحكيم عن التفرغ للعبادة: "الله أعلم قالته ولا مقالتهوش، ولو قالت كده ايه لازمة الإعلان، اعتزلي في هدوء ومن غير كلام ضد الفن»، وأضافت: «شادية لما اعتزلت مطلعتش في أي برنامج أو صحافة ولا قالت حلال ولا حرام، هي اختفت وخلاص، ومكنتش بترد على تليفونات ولا بتظهر ولا أي حاجة".