نشرت الفنانة ميرهان حسين، صور لها علي حسابها الرسمي عبر موقع تبادل الصور والفيديوهات "إنستجرام"، من أمام الكعبة المشرفة بالعبائة والطرحه البيضاء، وهي تؤدي مناسك العمرة. وعلقت علي الصور قائلة: "مع أن الصورة دي من أحب صوري لقلبي، اترددت أنزلها، أولًا خفت إن دا يأثر على ثواب حاجة بيني وبين رب العالمين". واضافت: "ثانيًا عارفة إن في ناس سطحية كتير هيكتبوا كومنتات كلها إيه يا طاهرة إيه يا ست الشيخة، ويعملوا فيها إنهم مبيغلطوش أبدا، وجايين يحكموا على ناس زيهم أحكام هبلة وخلاص، وهما مايعرفوش اللي بينك وبين ربنا ولا عمرهم ها يعرفوه، بس قولت لأ مش هامشي ورا الفكر دا وهنزل صورتي اللي بحبها عشان فيها ذكرى وجودي في أطهر بقاع الأرض، وأنا ضيفة في بيت الله الحرام، وبحتفل فيها بنعمة من أكبر النعم هي نعمة إن ليا رب عظيم اسمه الكريم اللي ممكن أطلب منه أي شيء ومفيش حاجة كبيرة عليه، إنما أمره إذا أراد شيئا أن يقول له كن فيكون". و اختتمت كلامها قائلة:" نعمة وجود ربنا في حياتنا أكبر من كل النعم، أنا حقيقي معرفش إزاي في ناس بتلحد وتنكر وجود ربنا والعياذ بالله، وفيه منهم أصحاب ليا وناس بقابلهم، ومع حبي ليهم بس بقولهم فايتكوا أعظم حاجة في الوجود إن يبقى ليك رب قادر على تحقيق كل اللي يتمناه قلبك، ويسرح فيه خيالك رب أكبر من كل كبير هو الأمان في الدنيا دي وكل من عليها فان".