أعلنت المطربة المصرية الشابة زيزي عادل نجمة ستار أكاديمي، اعتزالها الغناء نهائيا لتستطيع التقرب من الله. وقالت زيزي عادل: قررت أسيب مهنة الغناء، والقرار انا مخدتهوش امبارح انا واخداه من فترة كبيرة جدا، بس يمكن مطلعتش قلت وقتها لأني كنت حابة أتكلم مع نفسي ومع الناس القريبة أوى. وتابعت: الناس القريبة منى عارفين نفسهم، ولما قلتلهم على القرار شجعوني ودعموني كمان، ويمكن قرار الاعتزال ده بيبعدني عن أكتر مغريات الحياة وهي الشهرة والأضواء“. واستكملت: أنا ببعد عن الفن عشان بقرب من ربنا، والفترة اللى فاتت قربت من ربنا جدا، ولقيت أن القرآن بيقولي اني لازم اكون ست ملتزمة، وبحاول على قد ما بقدر أكون ملتزمة، وهتستغربوا شوية اني طالعة بشعرى ومش محجبة، ويمكن ده لأني لسه ربنا لم ينعم عليا بالحجاب، وبدعي ربنا يتممها عليا، وكل حاجة بتيجي خطوة خطوة ومفيش حاجة بتيجي مرة واحدة. وأضافت زيزي عادل: يمكن لما أخدت القرار تعرضت لمواقف واللي تسمى اختبار من ربنا، وكان اختبار صعب والإنسان ضعيف، لأن جالي عرض مجاليش وأنا بمارس مهنة الغناء، ولكن الحمد لله ربنا كرمنا وقدرت ارفض من دعم من ناس حواليا. واستدرجت: أنا حابة أموت وربنا راضي عني، ويمكن دي حاجة كلنا بنتمناها، فأنا مش عارفة هاموت امتى ولكن كل اللي عوزاه أكون مستعدة لمقابلة ربنا، وأقابله وأنا راضية عن نفسي وحياتي وأفعالي، والحمد لله ربنا كرمني والتزمت، وربنا يكرم التزم اكتر وادعولي ان ربنا يثبتنى على اللي انا فيه.