كشف السيناريست فتحي الجندي مؤلف مسلسل "تحية كاريوكا" عن أحد المواقف التي جمعته بالفنان الراحل سمير صبري، وذلك عبر حسابه الشخصي على موقع التواصل الاجتماعي "فيسبوك".     كتب فتحي الجندي منشورًا قال فيه:" لما كتبت كاريوكا، كلمته، أستاذ إحنا بنعمل مسلسل عن تحية كاريوكا، محتاج أتكلم معاك شوية، استضافني في بيته، منتهى الرقي والذوق والكرم وابن أصول بجد، واتكلمنا كتير ولقيت عنده كتير قوي".     وتابع:"اندهش لما قولتله انت هتلعب دورك في الحقيقة، دورك في المسلسل دور سمير صبري، وافق ومن غير شروط، وبعد قراءة المسلسل اتقابلنا تاني، وقال لي بمنتهى الخجل والتواضع انت يا فتحي مطلعني إني عملت خير ووقفت جنب توحه "يقصد كاريوكا"، ماهو ده اللي حصل يا أستاذ، وده اللي قالته كاريوكا في مذكراتها وكل لقاء ليها سواء في صحافة أو تليفزيون، إن حضرتك اللي وقفت جنبها في مرضها وأزمتها وصرفت عليها نحو ١٥ سنه لحد آخر يوم في حياتها، أنا ماعملتش غير الواجب، توحة كانت زي أمي، وصورنا المسلسل، واللي طلع على الشاشة كان أقل ألف مره من اللي عمله سمير صبري لكاريوكا، وده كان الدور الوحيد اللي في حياته يمثل فيه نفسه".     وأضاف فتحي الجندي:" واتقابلنا بعدها كتير، كل مرة كنت أتعلم منه، ومن سنة لقيته هو اللي كلمني روحتله البيت اداني ورق مسلسل إذاعي بخط الإيد وقال عايزين نعمله تليفزيون، واتكلمنا واتقابلنا، وراح هو والورق بتاعه لسه عندي في المكتب".     واختتم كلامه قائلًا:" نادر إنك تلاقي تاني مبدع شامل زي سمير صبري، فنان وانسان، في الجنة ونعيمها يا صديقي الأستاذ".