حلت الفنانة الكبيرة نادية الجندي ضيفة على برنامج "حبر سري"، الذي تقدمه الإعلامية أسما إبراهيم على قناة القاهرة والناس، حيث تحدثت عن رغبتها في الزواج مرة أخرى، مشيرة إلى أنها لا تمانع الفكرة. وقالت الجندي: "الزواج والحب حقي في الحياة، وعايزة شخص يكون راجل بجد وأحس إنه قد المسئولية وحنون أحس بالأمان معاه، ويكون صادق وخلوق". وواصلت: "السن مش عائق لأن فيه مواصفات تانية أهم، وأنا في الزواج ست بيت جدًا وزوجة مطيعة؛ لأني بفصل بين شخصيتي في التمثيل والحقيقة، وأنا إنسانة بسيطة.. ولو فيه خطة للزواج أو قصة حب عمري ما هخبي وأنكر. وتطرقت نادية الجندي، للحديث عن نجلها هشام، قائلة: "أنا أم صارمة جدًّا في تربية ابني وكنت أتمنى أخلف تاني ونجوميتي لم تضر هشام؛ لأنه مش بيحب الأضواء خالص، ولو كان موهوب معنديش مشكلة يمثل ولكنه أخد مسار تاني وحب جدًا الإلكترونيات ودي هوايته". كما كشفت عن رأيها في أداء الفنانة غادة عبد الرازق في مسلسل "الباطنية"، قائلة: "غادة عبد الرازق ممثلة قوية ولكني محبتش فكرة إعادة تقديم أعمال كان لها بصمة كبيرة مثل الباطنية، لأنه رسخ في وجدان الناس بالشكل اللي طلع بيه وبالتالي العمل هيتظلم والنجمة هتتظلم، لأن الناس بتقارن بينه وبين العمل الأصلي، وأنا لو جالي عمل نجح جدًا بأبطال معينة عمري ما هوافق أعيده تاني، والأعمال اللي بتتعرض بأجزاء كتير مش بتحقق نجاح، ودا رأيي الشخصي". وعن رأيها في فنانات الجيل الجديد، أكدت الجندي أنه لا أحد يستطيع أخذ مكانتها، قائلة: محدش أخد مكاني خلال الـ20 سنة الماضية، مع إن فيه فنانات كويسين زي منى زكي وياسمين عبد العزيز ومنة شلبي وبحبهم، ولكن مكانة نادية الجندي محدش يقدر ياخدها؛ لأني كنت متميزة وعملت لنفسي مكانة كبيرة عند الجمهور ولا أقلد حد ومحدش بيقلدني". وواصلت: "أنا اتحاربت كتير ومازلت بتحارب من فنانات إمكانياتهن محدودة ودي بتبقى غيرة، ومع ذلك عمري ما فكرت أأذي أي زميلة؛ لأني على أرض صلبة وجمهوري في ضهري مش محتاجة أعمل كده". وأضافت: "محمد مختار لولا وجودي مكنش هيبقى منتج لأني حببته في المجال، وشاف قد إيه أنا بتعب، وكنت بمثل وبنتج في نفس الوقت ولما دخل المجال وقفت جنبه كتير وأديته خبرتي.. ويمكن لم ينتج لرانيا يوسف لأنه تاجر في الأصل وبيقيم الأمور". وعن سبب رفضها المشاركة في مسلسل "ريا وسكينة"، قالت: "رفضت أشارك في مسلسل ريا وسكينة لأني كنت لسه عاملة مسلسل مشوار امرأة ونجح جدًا وخفت أعمل دور واحدة شريرة والجمهور يكرهني، ونفسي سمية الخشاب ترجع لنجوميتها تاني لأنها طاقة وموهبة كبيرة".