خلال حوارها مع الفنانة إسعاد يونس في برنامج "صاحبة السعادة"، ‏كشفت النجمة شيرين عبد الوهاب العديد من أسرار حياتها الشخصية للمرة الأولى، في أول ظهور تلفزيوني لها بعد أزمتها الأخيرة مع طليقها المطرب ‏حسام حبيب.‏ وتحدثت شيرين عن بداياتها الفنية وكواليس حفلها في ختام مهرجان قرطاج في تونس، مشيرة إلى أن الله منحها القدرة على ‏الغناء، ومؤكدةً: "أنا صحياً مكنتش قادرة أقف على رجلي في حفل قرطاج، وكنت بعرق على المسرح من ‏تعبي ومش مصدقة إني قدرت أغني وأحيي الحفلة، ووقفت بقدرة ربنا، وكانوا حاطين ليا 4 كراسي على ‏المسرح عشان لو وقعت أي لحظة، ولكن روحي رجعت لي ورجعت أتنفس". لتنخرط شيرين في البكاء بعدها.‏ وأضافت شيرين عبد الوهاب: "أنا رجعت لحياتي وصحابي ورحت لسميرة سعيد البيت أبارك لها على أغنية "‏كرباج"، ورحت لها لما اتعافيت لأني لازم أزورها وأنا حلوة ومقدرتش أشوفها وأنا جوايا طاقة سلبية".‏ وأردفت بالقول: "أنا مدلعة أوي بحب الناس وحاسة إني بقيت مسؤولة من الجمهور، وممتنة لكل شخص بيقابلني ‏في الشارع، واللي ربنا بيحبه بيحبب فيه الخلق، وبقول لجمهوري شكراً ليكم من غيركم عمري ما كنت هقدر ‏أرجع".‏ وعن أزمة تصريحها عن الموسيقار حسن أبو السعود، بعدما تعرضت لحملة من الانتقادات واتهمها البعض ‏بالإساءة إليه، قالت شيرين: "أنا عمري كله ضاع في الفن، وبعض الناس كانت متحفظة على تصريحاتي بس ‏بقول لهم دي أنا ومش بحب ألبس قناع للجمهور وأنا عفوية وطبيعية، ولما قلت إني شبه حسن أبو السعود ‏مقصدتش أي إساءة دا أبويا، ياريتني قولت إني شبه محمد ممدوح".‏ كما تطرقت شيرين للحديث عن مساعدة ابنتيها لها في أزمتها الأخيرة مع طليقها حسام حبيب، قائلةً: "أنا قلبي بابه ‏اتقفل خلاص وبقيت مبسوطة باللي أنا فيه وشوفت أن فيه ناس كويسة وزمان كنت فاكرة إن الناس كلها ‏طمعانين فيا، ووصلت لمرحلة كنت بطلب المساعدة من بناتي وبقولهم ساعدوني في تربيتكم أنا مش عارفة ‏أعمل إيه، وفي مرة بنتي لخصت كل حاجة في كلمتين وفوقتني وقالت لي يا ماما دا مينفعكيش ومن ‏ساعتها أنا اتغيرت".‏ وعن سبب مبادرتها بالصلح مع المطرب عمرو دياب، أكدت شيرين أنها لم تقصد أي إساءة، بالقول: "أنا صالحت عمرو ‏دياب لأني مقصدش أي إساءة، ومينفعش حد يعاتبني على كلام قولته في حفلة خاصة وكنت بهزّر، وأنا ‏بحترمه وبحترم الجيل دا بالكامل، واتربيت على صوتهم وصوت إيهاب توفيق واتعلمت منهم الغناء، وأنا ‏رجعت لصحابي بنفسية حلوة".‏ وأضافت: "سميرة سعيد هي قدوتي، واتعلّمت منها كتير هي ونوال الزغبي لأنهم ستات بيحبوا الحياة، ونوال ‏الزغبي كانت بتبعتلي وتشجعني أرجع أغني، ولكني مكنتش بعرف أرد عليها أقول لها إيه".‏