حلت الفنانة سلوى خطاب، ضيفة برنامج "كلام الناس"، الذي تقدمه الإعلامية ياسمين عز، عبر قناة "إم بي سي مصر"، وكشفت أسرار في حياتها الفنية والشخصية.   ويرصد " الفجر الفني " في السطور التالية أبرز تصريحات سلوى خطاب في برنامج كلام الناس، الذي تصدرت محرك البحث جوجل بسببها خلال الساعات الماضية.    صعوبات واجهت سلوى  خطاب في بدايتها الفنية    كشفت سلوى  خطاب، صعوبة دخولها التمثيل  بسبب إصرار جدتها أصرت على دخولها كلية التجارة، رغم رفضها، ولكنها التحقت بالكلية بالفعل قائلة: "أنا في الجامعة قرأت في الجورنال إنهم طالبين دفعة بنات في معهد فنون مسرحية، قلت أنا بحب الفن وهروح أقدم، ونجحت من وراهم، وسحبت ورقي من كلية التجارة وقدمت في معهد فنون مسرحية".   وتابعت: "في يوم تم نشر في الصحافة عني، وأعمامي شافوها وعرفوا، وحصلت مشكلة وخدت علقة موت منهم، وجدتي قالت لي إزاي تعملي كده، حد يسيب كلية تجارة ويروح معهد الرقاصين ".   وأكملت: "قولت لها في ناس ولاد عائلات بتدخل المعهد، وأوعدك إن اللي انتي ربيتيني عليها همشي عليه، مش إنت بتحبي أمينة رزق، أنا هكون زي أمينة رزق". قرار سلوى خطاب بعدم الإنجاب    كشفت سلوى خطاب عن سر عدم رغبتها في الانجاب قائلة:" ده قدر من عند ربنا، بس يمكن ربنا عارف حالتي، أنا مفهمش يعني إيه أجيب أطفال ومتحملش مسئوليتهم، أجيب أطفال يبقى لازم أتفرغ لهم، أنا هربي، طب ربيت كويس قوي، ده هيتطلب أنسى شغلي، وأنا كنت خلاص استهلكت في الجواز، من كتر ما أنا متفرغة للجواز، وبعدين أتجوز تاني وأخلف تاني، لأ، طب ما اعتزل أحسن، مكانش عجبني قوي، كنت حاسه كده، إن المجتمع ده لو خلفت فيه أنا هتعب، لإن فيه حاجات كتير مش عجباني".   وأضافت: "وأنا مش فاهمة يعني إيه تربية حديثة؟، وأجيب عيال يقعدوا يقرفوني، يقولولي لأ، نعمل كذا، شنطة هدومك يا حبيبي، شنطة هدومك يا حبيبتي، روحي يا حبيبتي المكان اللي انت عايزاه، وأخلص، أنا أجيب ناس تتعبني ليه؟، فالتربية الحديثة والجو ده مش بتاعي، مليش دعوه أنا يروحوا فين؟، أنا هشيل همهم، خلاص أنا مش عايزه، هوجههم كمان يروحوا فين؟، يروحوا مطرح ما هم عايزين، يعني عندهم لجوء سياسي يروحوا أي دولة، الحمد لله كان زماني متجرجرة في الأقسام، العيال عاملين فيا محضر، أمي ضربتني بالطفاية، ومش مليش خلق، هم مش هيفهموا مصلحتهم، إذا كنت أنا مفهمتش، فما بالك عيالي، صعب، الله يكون في عون الآباء".   وتابعت: "معنديش نقطة ضعف، الولاد نقطة ضعف، الحنية دي هيبقى قدامها حزم قوي، وبعدين هربيهم كويس قوي، يطلعوا بعد كده للمجتمع، يسمعوا أنتش وأجري، يعني هعمل إيه طيب، مش يبقى فيه تواصل".   رأي سلوى خطاب في عمليات التجميل    كشفت الفنانة سلوى خطاب ، عن رأيها في عمليات التجميل، مؤكدة أنها ليست ضد عمليات التجميل ولكنها تخشاها، والمهم بالأمر أن لا يتحول إلى هوس،  قائلة: " أنا بخاف من عمليات التجميل ومش مستوعبة الموضوع، أنا بحب أحافظ ولكن لو احتجت عملية تجميل هعملها، أنا بلاقي ممثلات ومطربات بقوا صغيرين أوي مش عارفة إزاي، وأنا مبسوطة ليهم، وأنا مش ضد عمليات التجميل، والمهم إنه ميكونش هوس".  وأضافت: " لو عملية تجاعيد ماشي ده الزمن هنروح منه فين، طب عملنا وشنا لكن النفسية هنعمل فيها إيه؟ يمكن لأني من النوع اللي مش شاغلة نفسي أنا ناسية تاريخ ميلادي".   كما كشفت الفنانة سلوى خطاب عن سر حفاظها على رشاقتها، قائلة: أنا باكل كل حاجة ولكن بمقدار صغير، وبحاول أنظم أكلي، ولكن دي ضريبة لو مكنتش في الفن كان زماني وزني كبير.   وتابعت متحدثة عن الفنانة الراحلة هند رستم: مرة كنت قاعدة مع العظيمة الراحلة هند رستم، كنا في مهرجانا وبنتكلم عن الأيام بتاعتهم وسألتها عن سر رشاقتها، قالتلي أنا كنا بنلعب رياضة وبناخد تدريبات رقص، وبنحرم نفسنا من الأكل، أنا مكلتش رز إلا بعد ما اعتزلت. اتهام سلوى خطاب بعداوة الرجل  وردت الفنانة سلوى خطاب، على اتهام البعض لها بأنها عدوة للرجل، قائلة: "معرفش الاتهام جه منين، يمكن الستات طلعوه عليا عشان يوقفوا سوقي". وأضافت: "مينفعش حد يعادي حد مش ممكن يكون في عداء، المرأة زي الراجل، أنا بعامل بني آدمين، اللي يهمني البني آدم شكله إيه أو البني آدمة شكلها إيه".   وأكملت: “أنا بحس إن الست المصرية شايلة مهام كتيرة قوي، مطلوب منها فوق طاقتها أكثر من الرجل”. وصدمت سلوى خطاب خلال  حوارها بالبرنامج،:"ليا واحدة صاحبتي  لها آراء عكس آرائك كده وطول اليوم المرأة وحقوق المرأة والكلام ده". وتابعت:" الراجل مش مطلوب منه حاجة غير شغله وياخد باله من بيته، وبدورها عقبت ياسمين عز،:": الراجل مش لازم يعمل مجهود عشان يكون جميل هو جميل لوحده".   وحذرت سلوى خطاب ياسمين عز، قائلة:" كفاية رومانسية والنبي وابقي فكريني لما تتجرجري من شعرك، لترد الأخيرة،:" لا أنا لا أقبل ده عليا أو علي غيري".   رأي سلوى الخطاب في حقوق المرأة   صدمت سلوي خطاب الإعلامية ياسمين عز خلال  حوارها بالبرنامج: "ليا واحدة صاحبتي  لها آراء عكس آرائك كده وطول اليوم المرأة وحقوق المرأة والكلام ده".   وأضافت سلوي خطاب: "قولتلها أنا مستنية أشوفك متجوزة عشان أشوفك متجرجرة من شعرك وفعلا حصل اتجوزت وأتجرجرت في الريسيبشن من شعرها"، وترد ياسمين عز: "أنا ضد العنف ولكن أنا مع أن كل طرف يمشي الأمور دون تعقيد أو مشاكل". كما صدمت سلوى خطاب ، ياسمين عز خلال  حوارها بالبرنامج قائلة:" عمتي كانت هتطلق عشان قالت لجوزها اقلع الجزمة وهي بتمسح، وأنا عارفة ان الكلام ده ضد ثوابتك".