ممثلة ومطربة متميزة إستطاعت أن تلفت الأنظار إليها مؤخرًا بعد مشاركتها بفيلم "تاج"، الذي قدمت من خلالة دور مختلف عليها تمامًا ولم تقدمه من قبل وهو "الشر". وكان للفجر الفني حديث خاص معها عن كواليس الفيلم والتعاون مع تامر حسني لأول مرة وسبب ابتعادها عن الدراما وتفاصيل أكثر عن حياتها الفنية. دورك كان مختلف وجديد عن بقية اعمالك، كان فيه جرئه شوية.. ماخوفتيش ان الناس ماتتقبلكيش في الشر؟   "لا بالعكس كان في إضافة عشان الناس تشوفني بشكل تاني غير الطفلة اللي اتعودوا يشوفوها".   حضرتي ازاي للدور؟   "مكنش في تحضيرات كبيرة التحضيرات كانت بيني وبين أستاذة سارة وفيق المخرجة وتامر كمؤلف قبل المشاهد". هل لما بتلاقي عمل سينمائي بيتهاجم بتشوفي ان ده نجاح ولا فعلًا بيكون الجمهور أحيانًا معاه حق؟ "لا الجمهور بقى عاده عنده الانتقاد للاسف دائرة الارتياح بتاعته بيبقى قاعد زهقان ف بيحس ان لازم يكسر ف مجهود اللي قدامه بس ده طبعًا مش دائمًا أحيانًا بيبقى الجمهور على حق". بما ان ده أول عمل يجمعك بتامر ايه الحاجة اللي ماكنتيش تعرفيها عنه واتفاجئتي بيها في اللوكيشن؟   "أي فنان كبير عنده إيجو غصب عنه تامر لا بيتعامل كإنه لسه بيبتدي،  شغفه شغف حد لسه ف بدايته وعنده ثبات انفعالي عظيم مهما اتضغط عليه هادي ومهما الناس تدافعت عليه بيعاملهم بهدوء،  ابهرني في مره بنت خبطته بالتليفون في عينه ومكانش قادر يفتحها وخد منها التليفون واتصور معاها رغم ان عينه اتأذت بجد وكان لطيف جدًا ف الحقيقة الموقف ده اتعلمت منه درس". ايه سبب ابتعادك عن الدراما ؟   "سبب الإبتعاد اني كنت برفض الأعمال اللي كانت بتتعرض عليا عشان مافيهاش إضافة ليا ".   ايه الدور اللي شوفتيه عجبك وقولتي ياريت كان اتعرض عليا سواء سنيما أو تليفزيون ؟   "الدور اللي قولت ياريت اتعرض عليا دور مي عمر في مسلسل "لؤلؤ". قولتي انك رفضتي كتير تعملي بطولة مطلقه.. امتى شايفة الوقت المناسب عشان تاخدي الخطوة دي ؟   "انا أخدت الخطوة دي قبل كده في اول فيلم ليا وهو "خطة چيمي" وماعنديش مانع اخد الخطوة تاني لو لقيت جهة إنتاج تأمن بيا زي إيماني بنفسي لما انتجت خطة چيمي مش هتردد".