حلّ الفنان رامي جمال، ضيفاً على برنامج "حبر سري" الذي تقدمه الغعلامية اسما إبراهيم على قناة القاهرة والناس، حيث كشف عن أكثر عيب في شخصيته مؤكداً أن حبه الزائد للشغل أثَّر على حياته الشخصية. وقال رامي: "أكثر عيب في نفسي الشغلة بتاعتنا بتسرق العمر وكل شويه أقول هخلص ألبوم ونسافر وندخل في اللي بعده ومراتي ديما تقولي مش مهم نؤجل". وأوضح أن النجاح والطموح يستحمله الفرد لأنه حلمه إنما شريك الحياة يتحمل لأنه يحب، مؤكداً أنه في أوقات كثيرة من حياته يكون مشغولاً ولكن مساحة زوجته في حياته تشغل مئة في المئة منها، حتى في الأوقات التي لا يكونان فيها مع بعضهما. ووجه رامي جمال، رسالة اعتذار إلى زوجته قائلاً: "أي حاجة زعلتها مني أنا مرضاش وإحنا أولاد أصول ومتربين وبشكرها على كل الحب والدعم اللي شوفته منها، حتى في الوقت اللي مش موجودين فيه مع بعض بنتواصل في التليفون وبأخذ رأيها في كل شيء في حياتي". وعن تفاصيل إصابته بمرض البهاق قال: "المرض بالفعل جالي بسبب الحزن، والقصة بدأت إني في يوم سافرت أصور أغنية ليا مع مخرج وكانت تكلفتها ضخمة مبلغ 100 ألف دولار، وبعد انتهاء التصوير لقيت المخرج بيماطل في تسليم الكليب". وأضاف أنه مع إصراره أخبره المخرج أن الهارد المسجل عليه كل تفاصيل الكليب اتكسر. متابعا: "كان ابتلاء كبير وحركة لو حد جديد ميقعش فيها وفكرت إنها ممكن تكون مقصودة ولكن طلع كلامه صح". وأوضح رامي، أن الواقعة كانت في بداية مشواره الفني، قائلاً: "راحت الفلوس وربنا كرمنا بالحل ولكن كان صعب وقتها، وبعد كده استشهد صديقي عمرو صلاح وحزنت جداً عليه لأنه صديق العمر وجالي بعدها السكر". وأكد رفضه الغناء في أماكن فيها شرب خمور أو تشاركه راقصات، قائلاً: "فكرة إني أغني في أماكن فيها شرب خمور برفض وعندي تحفظات على حاجات معينة وبرفض الرقاصات ومتطلعش الرقاصة معايا في فقرتي في حفلة أو فرح". وأوضح أنه يفضل الاستحواذ على الاهتمامات لذلك لا يفضل وجود راقصات معه، مضيفاً: "لو اتعمل لي مفاجأة بوجود راقصة في فرح همشي، والرقص فن في ناس بتحبه ولكن متطلعش معايا أنا شايف آخد الاهتمام لوحدي". وعن موقفه من تحريم الفن، قال: "أنا مش شيخ وأنا شايف كل المهن فيها الحلال والحرام وفي شبهات ممكن الواحد يتجنبها ومش عايز أحدد الشبهات عشان لو في زملاء بيعملوها، واللي يحلل ويحرم الشيوخ وشايف إن فني أقدمه لوحدي". كما أكد أنه من المستحيل تقديم ألحان لمطربي مهرجانات، قائلاً: "مستحيل ألحن مهرجانات ومش ذوقي وأنا أتحاسب على اللي بعمله ومش عايز أقدم فن أعتذر عنه بعد كده في يوم من الأيام، حتى لو الدنيا جت عليا مش هغني مهرجانات وأستعين بأهلي". وأضاف رامي أنه من نجوم الصف الأول في التلحين ولكن ما زال أمامه الكثير من الأحلام ليحققها. متابعاً: "أنا من نجوم الصف الأول ومن وجهة نظر السوق والمتعهدين صف أول ومن وجهة نظري لسه كتير على اللي حلمت به". واستكمل: "بالنسبة للأجر بأخد أجر أكثر من ناس كتير وبحب يكون ليا أجر مختلف ولسة نجاحات كتير، وعمرو دياب نموذج والنجاح سهل الوصول له إنما النجاح متغير والمهم الاستمرارية".