ردّت الفنانة هنا شيحة، على الانتقادات التي تتعرض لها شقيقتها الفنانة حلا شيحة، بسبب خلعها الحجاب وقرار عودتها للفن مرة أخرى. وقالت هنا: "إحنا إخوات برا الوسط الفني، لكن أنا كفنانة مليش علاقة بيها كفنانة، وهي ليها اختياراتها وحياتها ومينفعش أتدخل في ده.. أو يبقى ليا رأي سواء كان مع أو ضد. وتابعت: "أنا مبتدخلش في حاجة متخصنيش.. بشوف إن كل بني آدم مسئول عن نفسه، في ناس بتقولي إنتي أختها.. بس أنا مش المحامية بتاعتها ولا المتحدثة الرسمية، فياريت محدش ياخد رأيي ولا يسألني عن المواضيع الخاصة دي". وأضافت هنا: "أنا مبدخلش في الحياة الشخصية لأي شخص وكل شخص ليه الحرية في حياته الشخصية، وإحنا مش شغلتنا نتحكم في بعض ولا نحكم على بعض ولا نجلد بعض، علاقة الشخص الدينية دي بينه وبين ربنا، أنا مالي مبتدخلش في حياة حد، ولا مرة طلعت اتكلمت في موضوع أختي ولا موضوع أي فنانة المواضيع الخاصة دي أنا مبتكلمش فيها". وعن شائعات ارتباطها خلال الفترة الماضية، ردت هنا شيحة بأنها ليست في علاقة ارتباط حاليًا وهي سينغل ماما، معلقة: "الموضوع مش سهل بالنسبة ليا ومفيش علاقة حب براجل لكن في علاقة حب لنفسي، وبدأت أبني علاقة إيجابية مع نفسي، لأني كنت حزينة من نفسي في فترة ودائمًا أبحث عن السعادة، ومع الوقت والقراءة اكتشفت السعادة طلعت من جوايا أنا". وعن علاقتها بأولادها، قالت: "أنا كان حظي حلو لأن والدتي كانت بتساعدني وقت التصوير، وأنا من النوع اللي بينسق ما بين الأولاد والشغل، ودلوقتي هما كبروا وعارفين إني بشتغل ممثلة فخلاص مباقوش بيضايقوا خالص، ودائمًا بقول الحمد لله إن زمان كان عندي وقت أكتر أكون معاهم". وتحدثت هنا عن رأيها في فكرة اختفاء الفنانين وعدم تقديم أعمال فنية، قائلة: "لو حد حس إنه مش مطلوب، فالمفروض يشتغل على نفسه لأن السوق عرض وطلب، وفي ناس بتختفي ولما بتعمل كده الناس بتبطل تشوفهم، واتقال ليا إني بختفي وده بسبب إن مش عجبني اللي بيتعرض عليا فبستنى وده الصح، لكن مش عشان معجبكش المعروض عليك تختفي، لأ لازم تشتغل على حاجة أنت عايزها واعملها، الحركة بركة يعني اللي مش عاجبه المعروض عليه يعمل هو حاجة تانية".