خلال استضافته في برنامج "بيج تايم بودكاست"، الذي يقدمه الإعلامي عمرو أديب عبر قناة MBC كشف النجم كريم عبد العزيز عن صفات المرأة التي تلفت نظره، وسبب حبه لاقتناء احدث الأجهزة الإلكترونية، ويفجر مفاجأة عن الراحل أحمد زكي، وذلك في السطور التالية: - وجهة نظري إن سر المرأة في أظافر يديها ورجليها، أنا تفرق عندي التفاصيل دي جدا، وهي أول حاجة تلفت نظري. - أحب الست القوية المفكرة، اللي عندها وجهة نظر وتقول رأيها، نأخذ به أو لا نأخذ به ده وضع ثاني المهم تقول رأيها، وأحب الست الموجودة الذكية، الصاحية المنورة، وأنا عمري 48 سنة فمن الأربعينات تبدأ تجذبني. - أنا بحب الإلكترونيات جدًا، أجهزة تليفزيون جديدة أو أجهزة صوت ومزيكا وكمبيوتر، وعندي أستوديو حلو جنب البيت، وبقيت صايع بلاي ستيشن". - ممكن أشتري أجهزة بدل الهدوم، وعندي صفة لو في هدوم حبيتها أشتري منها 40، والناس تفتكر إنها مش بتتغير، وأنا مجنون باللون الأسود، لون بيلم وستار. - أول لما نزلت فيديو تأييد للرئيس اتعمل فيَّ عمايل وكإني عميل لإسرائيل، أنا قُلت رأيي ووجهة نظري ليه التوحش وشتيمتي طيب ذنب الأب والأم إيه لما يتشتموا". - أنا مش شاطر في السوشيال ميديا ومش عارف أقتحمها، وبقول للناس انتقدني عادي بس ما تشتمش أبويا وأمي ليه حالة التوحش اللي مسيطرة على الناس في السوشيال ميديا دي". - أعتقد إن حالة التوحش اللي علي السوشيال ميديا وكثرة الشتائم والسباب السبب وراءها تعليم وظروف اقتصادية، أكتر شيء إحنا اتأذينا منه الفترة الأخيرة تدهور التعليم، والظروف الاقتصادية القاسية والثورات". - انتقدني وقُل لي أنت ممثل فاشل يا كريم، هقول لك شكرًا، لكن تشتمني وتسبني وتسب أبويا وأمي ليه، أنا بتأثر وبزعل وبتضايق لما أشوف حد بيشتمني أو بيشتمني بالأب والأم. - "الفيل الأزرق" بدايته معي غريبة جدًا تواصلت مع مروان حامد وأخبرته اننا نريد ان نعمل سويا وبعد شهر أرسل لي رواية احمد مراد وجالي ذهول، وقالي تعمل الفيلم، فقولتله موافق، ومروان فتح لي باب في التمثيل كنت بعيد عنه. - الفيلم حقق ردود فعل قوية للغاية، وأرقام في الإيرادات لم تتحقق من قبل، وأنا أرى أن الجمهور العربي هو البطل الحقيقي. - أثناء تواجدي في حفلة برأس السنة تفاجأت إن ٢٩ من أصدقائي تعرضوا للإصابة بكورونا، وتفاجأت إني كنت المصاب بها ولا أعرف ونقلتها لهم. - لي الشرف إني اشتغلت مع الأستاذ أحمد زكي، وأعتقد إن هذا الممثل لن يتكرر في مصر. - أحمد زكي أصيب بالعمى في أواخر أيامه، وكان يطلب من عماد أديب ويقول له لما أخرج أعمل دور واحد أعمى علشاني.