تحدثت النجمة منال سلامة عن دورها في مسلسل "صيد العقارب" وتأثيره عليها موضحة أنها عانت بسببه من الاكتئاب وكانت تبكي طوال الوقت. وأوضحت خلال حلولها ضيفة على برنامج "السفيرة عزيزة" أن "الدور كان نفسياً قاسي، وكنت بروح كل يوم مكتئبة بعد التصوير لأنه كله حزن وكآبة، وكنت أبكي فجأة لوحدي أبقى بصلي وأبكي وأنا مش فاهمة ليه، أكون قاعدة بقرأ قرآن خصوصا إننا كنا بنصور في رمضان ألاقيني منهارة وافتكر ذكريات في حياتي زي موت أبويا وأولادي وهما بعاد عني، وأنا مش فاهمة ليه". وتابعت: "الدور أرهقني جداً نفسياً، لحد ما خلص المسلسل واتعرض ابتديت أدرك إن دا كان السبب". وأضافت: "أنا دوري في مسلسل "صيد العقارب"، مش كبير كمساحة لكن كل مشهد مؤثر، كان لازم أدرسه كويس، الشخصية بتتعرض لموقف صعب بعد موت جوزها، قرأت في علم النفس ودرست مراحل تأثر الشخصية من رفض لعدم تقبل الأمر والإدراك والانهيار". يذكر أن مسلسل "صيد العقارب" بطولة غادة عبد الرازق، رياض الخولي، سيمون، ومنال سلامة وهو من تأليف باهر دويدار، وإخراج أحمد حسن.