ماجد محمد خرج عصام الحضري، حارس مرمى الأهلي المصري ومنتخب مصر السابق، عن صمته ورد على الانتقادات التي تعرض لها في الأيام الماضية بسبب تصريحاته عن لقب «الأسطورة»، في الكرة المصرية. وقال عصام الحضري، في تصريحات صحفية:”الناس زعلانة ليه من إنى بتكلم عن حقيقة وهى إنى أسطورة، ودا مش كلامى دا كلام (فيفا)، وبعدين لما أفرح بنفسى واحتفل بإنجازى دا حقى ولو ماحتفلتش دلوقتى احتفل لما أموت وأنزل (التربة)، ولو حد زعلان فبقوله ازعل براحتك أنا أسطورة وقفازاتى في متحف الفيفا تشهد بذلك». وبسؤاله لماذا يصف نفسه وصلاح فقط بمن يستحق لقب أسطورة، واصل :”بحترم كل زملائي، ولما بتكلم بقول حقيقة، فهناك أسطورة محلية لو فزت بدورى وكأس وهناك أسطورة قارية لو حققت إنجاز على مستوى إفريقيا.” وأضاف:” احنا عندنا هنا أساطير كتير زى أبوتريكة ومتعب وفتحى وأحمد حسن، وكل الأجيال التي حققت بطولة إفريقيا، لكن على المستوى العالمى مفيش أسطورة غيرى أنا وصلاح، وبدليل (فيفا).” وتابع :” لما يدعونى لاحتفالاته يدعونى كأسطورة من أساطيره لإنجاز أكبر لاعب في التاريخ في مونديال روسيا، وأنا الوحيد من مصر الذي تم وضع قفازه في متحف فيفا وصلاح حتى الآن لم يوضع شىء باسمه في المتحف، وأتمنى أن يحدث ذلك قريبا». واختتم حديثه:”زمان كان أي حد يلعب كورة الناس تقوله يا (كابتن مصر)، دلوقتى لو لاعب لعب (أوت) كويس الناس تناديه يا (أسطورة)، وفى ناس محدش فاكر ليها ماتش بس بتظهر كل يوم، في الإعلام ويلقبوها يا أسطورة، وأنا بقول رأيى مابزعلش من حد لم ينتقدنى، وشايف نفسى زى أهرامات مصر الثلاثة وكمان أبو الهول، ومن حقى إنى أفتخر بكل ما هو جميل وتاريخى في بلدى.”