كشفت النجمة مي عز الدين تفاصيل 48 ساعة من الصراع مع إدارة قنوات MBC بهدف عرض مسلسلها الجديد "وعد" على قناة MBC مصر الأولى وليست الثانية، وأكدت أن طلبها قوبل بالتجاهل أولاً ثم الرفض أخيراً، مؤكدة أنها تلقت رسالة من إدارة القناة لإخطارها بأن القرار "مقصود" بهدف الترويج للقناة المجهولة عند أغلب المصريين، ووعدت مي بقبول التحدي . مي التي ألمحت بالأمس عن أزمة جمهورها الذي فشل في متابعة مسلسل "وعد" بسبب عدم بث قناة MBC مصر الثانية إلا عبر تردد ضعيف لا يمكن لجميع المشاهدين متابعته داخل مصر، كشفت التفاصيل كاملة اليوم عبر بيان لجمهورها قالت فيه: "طيب أنا قضيت اليومين اللي فاتو بحاول أطالب إدارة قنوات Mbc مصر بزيادة إعادات المسلسل وعرضه علي قناة Mbc مصر كمان لأنه بيتعرض علي Mbc مصر 2 فقط و دي ناس كتير مكانتش تعرفها ولا منزلاها وهو المسلسل الوحيد((( اللي من إنتاج شركة تابعة ليهم و بالتالي كان من المنتظر الإهتمام بعرضه علي قنواتهم الإثنين )) و مع ذلك مش راضيين يخلوه بيتعرض علي القناتين بتوع Mbc مصر و سايبينه علي Mbc مصر 2 بس". تابعت: "و في الآخر الرسالة الوحيدة اللي وصلتني إن ده مقصود علشان دي الفرصة إن القناة تتعرف !!! يعني انا كده مطلوب مني أقوم قناة لوحدي !!! تمام و انا بقول لmbc قبلت المسؤلية و بإذن الله ربنا يكرم و القناة و المسلسل يتشافو و الحمدلله فيه علامات باينة من كم الإعلانات اللي جه من بعد اول حلقة للمسلسل و غيره وانا هعتبره إمتحان ليا يعرفني قدري عند الناس و هل فعلا بيحبو مسلسلاتي أو لا و نسبة الجماهيرية اللي وصلتها ايه مع اني مهما كان ليا جمهور اكيد كنت اتمني اني اتشاف من الناس اللي مش من جمهوري لأن ساعات بتكون كمشاهد ملكش في ممثل لكن لو قابلت حلقة لمسلسله بالصدفه و عجبتك بتقرر تتابعه و ده في الاخر بيبقي خلاني كسبت مشاهد جديد بقي بيحب يتفرج علي اعمالي و ده طبعا مش هيحصل السنة دي لأن مفيش حد بيبقي معدي و بيشوف القناه دي بالصدفة". أضافت: " الناس لسه اصلا بتتعرف علي طريقها من خلالنا و بينزلوها ... لكن قدر الله و ما شاء فعل و بالتالي عندي طلبين اولا بطلب من جمهوري و روابط الفانز بتاعتي تساعدني في نشر تردد القناه لكل الناس اللي مش عارفة تجيبها و بطلب من صحافتنا تشهد انا بدأت رمضان بقناة كم الناس اللي عارفها قد ايه و صفحتها حتي علي الفيسبوك فيها كام و بعد رمضان تقولولي بأمانة هل قدرت فعلا في ظل الظروف دي أنجح ولا لأ . و متابعة نسبة مشاهدة القناة علي اخر رمضان هتكون وصلت لأيه و مشاهدة المسلسل علي موقع شاهد دوت نت وصلت لأيه لأنه المكان الوحيد اللي الناس تقدر تشوف الحلقة فيه لو موصلوش للقناة. شهادة الصحافة و الجمهور ساعتها تعويض يكفيني.