نشرت الفنانة شذى على صفحتها الشخصية على موقع التواصل الاجتماعي «فيس بوك»، تعليقًا ترد من خلاله على تصريحات أطلقها أول أمس الفنان الشعبي عبدالباسط حمودة، في برنامج «العاشرة مساء»، يسخر فيها منها مشيرًا إلى أن الفنان الذي لم يغن في الموالد والشوارع لا يعد فنانًا، وأوضحت شذى أنها لها تاريخها الفني كما أنها تعد من الفنانات لأنها تشرفت وقدمت العروض الغنائية في دار الأوبرا كما سخرت من أغنيته «أنا مش عارفني». وقالت شذى: «بالنسبة للأستاذ عباسط حمودة أنا سكت أول مرة وقلت راجل كبير وعيب أرد، شارع الهرم اللي بنسبالك مقياس والموالد اللي واضح إن من كتر ما أنت غنيت فيهم مضيقينك فبتحاول تعمل فيها متقبل الموضوع، وبتقول وترد على نفسك وأساسا محدش عاب على اللي بيغنوا في موالد ولا شارع الهرم ما كل واحد يغني مكان مهو حابب محدش يقدر يقيم حد ولا يحكم على حد.. أنا فعلا محالفنيش الحظ الفظيع إني أغني فيهم اعملك إيه طيب؟ إنت ليه بتحاول تعمل حوار وموضوع للأسف يا سي عبااااسط أنا مغنتش في موالد ولا غنيت في شارع الهرم ولا كنت مع اللي راحوا الهرم ولا بتحصل، والواقع أن فيه اختلاف ثقافات وتربيه وأسلوب». وتابعت: «وبالنسبه لأنك فجأه عملت فيها (بيتهوفن الفن) فأنا غصب عنك فنانة مش عافيه مني ومش رأيي ده رأي الجهات المحترمة المعنية بالفن المحترم زي دار الأوبرا اللي اتشرفت وكنت صوليست فيها، وطبعا مش هتفهم يعني إيه صوليست فهترجمهالك بلغتك يعني بقدم (نمره لوحدي) على أوركسترا بيقودها دكتور سليم سحاب، وواحدة تانية كان بيرأسها الدكتورة رتيبة الحفني الله يرحمها، فلو سمحت لما تطلع تاكل عيش في البرامج متحكيش في المحكي وتجيب في سيرتي وتبروز نفسك وتعمل فيها فلوطه لإنك نص معلوماتك الفنية في الحلقة رايحة في داهية». واستكملت: «وطبعا أكيد مش هتفهم ولا حرف من اللي أنا كتباه ده لأن أساسا الأغنية اللي ضربتلك وإتعرفت بيها كنت أساسا تايه فيها وطول مده الأغنية مش عارف نفسك يعني واحد طول الأغنية بيقول (أنا مش عارفني أنا تهت مني) هعتب عليه فإيه والنبي لما يلاقي نفسه بقى نبقى نتفاهم».