لا تاخذْ اليومْ قلبي وتَهْمِلِهْ باكِرْ                        ما أقدَرْ أنا عَ الفراقْ ولوعةْ الهجرانْ خَلِّكْ معي كلِّ لَحظَهْ بعمركْ الزَّاهرْ                             إيَّاني وإيَّاكْ تَتْركني معْ الجدرانْ ما اَحبْ أنِّي أكونْ الرَّابحْ الخاسرْ                         لي يجمَعْ الثَّلجْ في إيدينهْ معْ النِّيرانْ نوعكْ أعَرفِهْ لعوبْ وساحرْ وماكرْ                           ياخذِكْ لينْ النَّهَرْ ويرَجِّعِكْ عَطشانْ إنتهْ علىَ الرُّوحْ يا ظَبيْ الفلا تامِرْ                       لكْ في ضميري مكانْ ولكْ بقلبي شانْ الزِّينْ هذا ما هوُ بينْ البِشَرْ شاهرْ                      زينكْ سماوي وعودكْ مثل غصنْ البانْ ولكْ جبينِ يضَوِّي نورَهْ الباهرْ                             ولكْ خدودٍ ورودْ وزاهياتْ ألوانْ ولكْ شعَرْ مثلْ ليلٍ بهْ أنا ساهرْ                          طويلْ داجي ظلامَهْ بهْ تخافْ الجانْ اللِّي يشوفْ البراءهْ بوجهكْ الطَّاهرْ                         ما يدري أنِّهْ تحتْ هذا الطِّفِلْ شيطانْ وإذا تريدْ الحقيقهْ هاتْ م الآخرْ                             اَخافْ دوني تضيعْ بعالمْ النِّسيانْ كلما أشوفكْ تفَكِّرْ قلت يا ساترْ                            في إشُّو يفَكِّرْ حبيبي قايدْ الغزلانْ إنْ كنتْ شاطرْ فأنا بسْألكْ يا شاطرْ                        إنْ كانْ عندكْ جوابْ ومعرفهْ وبرهانْ عنْ عادةٍ في بلادي ذكرَها سايرْ                     منْ خمسةْ حروفْ لا هنْ زودْ أوْ نقصانْ وعن شَيْ مشهورْ كانكْ للأسمْ ذاكرْ                             في لهجةْ الدَّارْ تلقاها مَعْ الخلقانْ إيجابْ واللِّي يجيبهْ مَبْ ترَىَ تاجرْ                              واللِّي بَيَشريهْ ما يشريهْ بالأثمانْ الألفْ واللامْ في الأوَّلْ وفي الآخرْ                           وفي تاليْ الأبجديِّهْ للحروفْ إعلانْ والنَّاسْ أجناسْ حَدْ خاسرْ وحَدْ ظافرْ                        والفاهْم إيعَرفْ مقصودي علىَ ما كانْ وَضَّحتْ لكْ شَيْ مخفي وتَدريْ الشَّاعرْ                          إيعَرفْ سَبْكْ الحروفْ ولِعْبَةْ الأوزانْ وحَطِّيتْ لكْ لغزْ حَلِّهْ عندكْ وظاهرْ                               قَصْدي أسَليِّكْ بالتَّفكيرْ والقيفانْ مبْ صعبْ لكنِّ يبغي خاطرٍ حاضرْ                           حاولْ معْ الناسْ والميدانْ يا حميدانْ