أنا أبغى أسأل سؤال واحد بس لكل الرياضيين الموجودين في بلدنا وأبغى الإجابة منهم لو يتكرموا ، كم سنة لنا بنلعب كوره وكم سنة لنا ونحنا بنشارك في بطولات عربية وخليجية وعالمية وكم نجم كروي اعتزل الكورة وما استفدنا منهم في تدريب أنديتنا ومنتخباتنا ايش الفرق مابين المدرب الوطني والمدرب الخواجه ؟ مو الاتنين لعبوا كورة في صغرهم مو الاتنين لعبوا في الحارات مو الاتنين لعبوا في أنديتهم مو الاتنين مثلوا منتخباتهم مو الاثنين عاشوا في الملاعب اكتر من 20 سنة مو الاتنين اخدوا دورات تدريبية مو الاتنين طوروا نفسهم عشان يصيروا مدربين طب ليش بعد كده بنشوف هدا اللاعب الخواجه اللي كان لاعب في صغره وفي شبابه مدرب لناديه أو لمنتخب بلده بعد اعتزاله وبنشوف لعيبتنا اللي حرثوا الملاعب سنوات طويلة مهمشين بعد اعتزالهم فين التطوير وفين الدورات التدريبية اللي نسمع عنها بس وما بنشوفها من اتحاد الكرة، ايش معنى بنشوف بعض من اللعيبة زي ماجد عبدالله ومحمد عبدالجواد ونواف التمياط وعبدالله الشريدة ومحيسن الجمعان وخالد الشنيف وعبدالرحمن الرومي اتجهوا للتحليل الرياضي في بعض القنوات الرياضية سواء السعودية أو العربية ليش اتحاد الكرة متجاهلهم ليش ما يحتويهم ويجتمعوا معاهم ويرسلوهم ياخدوا دورات تدريبية في معاهد التدريب العالمية طالما بنشوفهم محللين رياضيين في قنواتنا وفي قنوات أخرى فين لعيبتنا اللي اعتزلوا الكورة من سنوات وهما اللي كانوا ملء السمع والبصر ليش اتحاد الكرة تجاهلهم ليش ما حاول اتحاد الكرة يوقف معاهم ويحببهم ويرغبهم في التدريب ويعتمد لهم ميزانية محترمة ويرسلوهم عشان ياخدوا دورات تدريبية في المعاهد التدريبية العالمية ، اليين متى ونحنا ماسكين في المدرب أبو عيون زرق وشعر أشقر ؟ اليين متى والاندية بتتعاقد مع مدربين أجانب بملايين الريالات والدولارات اليين متى وخيرنا لغيرنا مو المدرب الوطني واللي هوه ولد البلد أولى بهادي الملايين لو مسكنا بيدهم وأرسلناهم ياخدوا دورات تدريبية وبعد كده نمسكهم الاندية والمنتخبات لكن للأسف بنتعاقد مع مدربين أجانب بالملايين ونترك ولد البلد مهمش ونحرمه من خدمة بلده في المجال الرياضي الكروي والمصيبة الكبيرة كمان لما يجوك بعض من الكتاب الرياضين واللي يشار إليهم بالبنان ويحاربوا ما تبقى لنا من المدربين الوطنيين عشان أنديتهم ما حققت بطولات يانااااس ياهوووه يا اتحاد الكرة نبغى نشوف مدربين وطنيين في أنديتنا ومنتخباتنا اعطوهم فرصة للتدريب وإن شاء الله حتشوفوا الخير منهم وفكونا من حكاية المدرب الاجنبي اللي جاء ياكل الاخضر واليابس وبس .. وعيشوا كتييييييير تشوفوا كتيييييير.